Kigali

Nicolas Sarkozy wahoze ayobora u Bufaransa yongeye gusura Rwanda

Amakuru   Yanditswe na: Nsanzimana Ernest 15 January 2018 Yasuwe: 326

Perezida w’ u Rwanda Paul Kagame kuri kuri uyu wa Mbere yakiriye muri Village Urugwiro, Nicolas Sarkozy, wahoze ari Perezida w’u Bufaransa kuva ku wa 16 Gicurasi 2007 kugera ku wa 15 Gicurasi 2012 waherukaga mu Rwanda muri 2010.

Sarkozy yaherukaga mu Rwanda mu 2010 ubwo yari akiri Perezida w’u Bufaransa, akaba ari nawe muyobozi mukuru w’u Bufaransa wari uje mu Rwanda kuva Jenoside yakorewe Abatutsi mu 1994 yarangira.

Sarkozy ni nawe muyobozi wa mbere w’u Bufaransa weruye akemeza ko u Bufaransa bwagize uruhare muri Jenoside n’ubwo we yavuze ko hari "amakosa u Bufaransa bwakoze.".

Ibiganiro bya Perezida Kagame na Sarkozy kuri uyu wa Mbere tariki ya 15 Mutarama 2017 byitabiriwe na Minisitiri w’Ububanyi n’Amahanga w’u Rwanda, Louise Mushikiwabo. Sarkozy yabwiye Perezida Kagame ko yishimiye kugaruka mu Rwanda nyuma y’igihe kinini. Kugeza ubu, Ibiro by’Umukuru w’Igihugu ntibiratangaza icyari kigambiriwe muri uru rugendo rw’uyu munyapolitiki.

Perezida Kagame yaherukaga guhurira na Sarkozy mu nama ya UNESCO yabereye i Paris mu Bufaransa muri Gashyantare 2015 yigaga ku ikoranabuhanga rigezweho.

Mu 2006, u Rwanda rwirukanye Ambasaderi w’u Bufaransa, Dominique Decherf, nyuma y’impapuro zo gufata abayobozi bakuru b’u Rwanda zari zasohowe n’umucamanza w’Umufaransa, Jean Louis Bruguière.

Amaze gusimbura Perezida Jacques Chirac ku buyobozi bw’u Bufaransa, Nicolas Sarkozy yakoze ibishoboka mu kuzahura umubano w’ibihugu byombi, usubira ku murongo mu Ugushyingo 2009, maze nyuma y’amezi make mu Rwanda hoherezwa Ambasaderi Laurent Contini.

Uyu na we yahamagajwe n’u Bufaransa mu mpera za 2011, u Rwanda na rwo rwanga kwakira Hélène Le Gal wari woherejwe ngo amusimbure. Nyuma y’amezi atandatu ni bwo u Bufaransa bwohereje Michel Flesch kubuhagararira mu Rwanda, we aza kwemerwa. Kuva yagenda mu 2015, u Rwanda ntiruremeza uwasabiwe kumusimbura.

Nicolas Sarkozy wari Perezida w’u Bufaransa mu kiganiro n’Abanyamakuru muri Village Urugwiro tariki ya 25 Gashyantare 2010, yemeye uruhare rw’igihugu cye muri Jenoside yakorewe Abatutsi aho yagize ati “Turazirikana uruhare rw’u Bufaransa muri Jenoside yabaye mu Rwanda.”

Sarkozy yakomeje agira ati “Turemera amakosa yakozwe n’Abanyapolitiki b’u Bufaransa, hari amakosa yakozwe muri Opération Turquoise, hari uruhare rw’umuryango mpuzamahanga, Ababiligi na Loni”.

Icyo gihe yavuze ko intambwe itewe ishimishije ku bihugu byombi kuko igamije ubwiyunge ku baturage b’ibihugu byombi.

Nyuma y’amezi atatu Perezida Nicolas Sarkozy avuye i Kigali, Perezida Kagame nawe yasuye u Bufaransa ubwo yitabiraga inama y’Abakuru b’ibihugu bikoresha Igifaransa yabereye i Nice.

Tariki ya 31 Gicurasi 2010, Perezida Kagame yabwiye itangazamakuru ko u Rwanda rukeneye abafatanyabikorwa, ariko rudakeneye abarutegeka.

U Rwanda ruhora rukangurira u Bufaransa kujyana mu nkiko abayobozi bakekwaho kugira uruhare muri Jenoside, ariko iki cyifuzo ntikigeze cyubahirizwa.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

PL iravuga ko niribona imyanya mu nteko hari ibizahinduka ku byiciro by’...

Umuyobozi w’ ishyaka riharanira ukwishyira ukizana kwa buri muntu PL...
14 August 2018 Yasuwe: 669 1

Umukozi w’ akarere ka Rwamagana wishimiye intsinzi y’ akarere kabo mu buryo...

Kuri uyu wa 9 Kanama 2018 nibwo hatangajwe uko uturere twarushanyijwe kwesa...
10 August 2018 Yasuwe: 5745 1

Perezida Kagame yarakariye abayobozi bategera abaturage ngo ntibashaka...

Perezida w’u Rwanda Paul Kagame yanenze bikomeye abayobozi batandukanye...
9 August 2018 Yasuwe: 2321 0

Ibyemezo by’inama y’abaminisitiri yateranye ku wa Gatatu tariki ya 08 Kanama...

None ku wa Gatatu, tariki ya 08 Kanama 2018, Inama y’Abaminisitiri yateranye...
9 August 2018 Yasuwe: 3232 0

Abakandida 521 nibo bazatorwamo abadepite 80, abigenga babaye...

Komisiyo y’amatora (NEC) yatangaje ko mu bantu 539 batanze kandidatire zabo...
6 August 2018 Yasuwe: 1100 0

Perezida Kagame yamaze ubwoba abatinya kujya mu gisirikare ngo...

Perezida w’ u Rwanda Paul Kagame akaba n’ umutoza w’ ikirenga w’ Abanyarwanda...
5 August 2018 Yasuwe: 4604 0