Rulindo: Umusirikare wiyiciye umugore yakatiwe gufungwa burundu

Amakuru   Yanditswe na: Nsanzimana Ernest 25 June 2018 Yasuwe: 1836

Caporal Janvier Nsengimana wo mu murenge wa Kisaro wakekwagaho kwica umugore we muri Gicurasi, agahunga ariko nyuma akaza gutabwa muri yombi yahamijwe iki cyaha kuri uyu wa 25 Kamena ahita akatirwa gufungwa burundu.

Inkuru ibabaje y’umugore wishwe n’umusirikare mu karere ka Rulindo yamenyekanye tariki 9 Gicurasi 2018, bikaba byaravugwaga ko umusirikare witwa Janvier Nsengimana ari we ukekwa kwica umugore we agahita ahunga ubutabera.

Caporal Janvier Nsengimana watawe muri yombi ageze i Kubungo (Ngoma), yaburanishirijwe aho yakoreye icyaha.

Umwe mu bari muri uru rubanza yabwiye umuseke ko Capl Nsengimana yireguye avuga ko atashatse umugore kugira ngo amwice ahubwo ko yamushatse kugira ngo yubake umuryango kuko ntawo yagiraga.

Yavuze ko kumwica byamutunguye kuko ngo bapfuye amafaranga yari amubajije, akaba yari yarayamwoherere ari mu butumwa bw’akazi, ngo umugore ntiyamusubiza neza.

Aho ngo niho byaturutse kugira amwice, kuko ngo umugore (nyakwigendera Akimana Claudine) yabanje kumutera ibuye riramuhusha rifata urugi ariko ngo rinamukomeretsa ku kaboko, na we ararifata arimutera mu mutwe, muri nyiramivumbi.

Capl Nsengimana yavuze ko akimara gukubita umugore we ibuye atahise apfa ahubwo ngo yatangiye gusamba, agerageza kumukorera ubutabazi bw’ibanze, kuko ngo yumvaga amwiciye mu gace avukamo ku buryo abaturage nibabimenya na we bamwica, afata ishati yari ihari ngo amukorera ‘first aid’, amucucagira amazi ngo arebe ko yahembuka, ariko ngo aranga arahwana ari na bwo yamushyize ku gitanda, arahunga.

Umushinjacyaha na we ushinja Capl Nsengimana kwica umugore we akoresheje ibuye, yanze ibisobanuro yatanze yiregura, avuga ko nta kimenyetso agaragaza ko umugore we yamuteye ibuye rikamukomeretsa, avuga ko yari afite uburyo bwose bwo guhunga umugore warakaye aho kumukubita ibuye mu musaya.

Yavuze ko bitumvikana uburyo umuntu yica undi yarangiza akaza kumukorera ubutabazi bw’ibanze, yungamo ko umurambo wa nyakwigendera basanze atari ishati iwuriho ahubwo ko basanze ari ishuka imuziritse mu ijosi, akemeza ko yamuhotoye ngo abaturage batabimenya, nubwo ibizamini bya muganga byemeje ko nyakwigendera yazize ahanini gukubitwa cyane ikintu mu mutwe.

Umwunganizi mu mategeko wa Caporal Nsengimana yavuze ko umukiliya we akwiye imbabazi kuko ngo yaburanye yemera icyaha, ndetse ngo yasabye imbabazi ingabo z’u Rwanda (RDF) n’Abanyarwanda bose ku bw’icyaha yakoze, bityo agasaba ko yahanishwa igihano gisubitse kubera ko yasize abana, akaba yadohorerwa akajya kubarera.

Umwunganize wa Capl Nsengimana avuga ko uwo yunganira yabanje gukubitwa ibuye, ibyo yise ‘ubusemburacyaha’, nubwo yabuze ibimenyetso bigaragaza ko ibyo byabaye.

Ubushinjacyaha bwo bwavuze ko ahubwo Caporal Nsengimana yishe umugore we yabigambiriye kuko ngo yari amaze imyaka itanu atagera mu rugo atanaruhahira, ariko inshuro imwe yahageze asiga umugore apfuye.

Ibyo byose nibyo Abacamanza b’Urukiko rwa Gisirikare baciye uru rubanza bahereyeho, nyuma yo kwihera isaha banzura ko Caporal Nsengimana ahamwa n’icyaha bityo ahanishijwe igifungo cya burundu nk’umuntu wishe undi abigambiriye, bavuga ko afite igihe cy’iminsi 30 cyo kujurira.

Umushinjacyaha yahise avuga ko abaregera indishyi na bo bazabikora nyuma y’isomwa ry’uru rubanza.

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Kanyankore alex wayoboraga BRD yaburanye ahakana ibyo aregwa

Kuri uyu 17 Ukwakira uwahoze ari Umuyobozi wa Banki itsura Amajyambere...
17 October 2018 Yasuwe: 594 0

Rwanda: Abakurikiranyweho kwiba Access Bank basabiwe gufungwa imyaka...

Abanyarwanda n’ Abanyanigeria bahakana icyaha cyo kurema umutwe w’abagizi ba...
16 October 2018 Yasuwe: 3632 0

Abacamanza b’ Abafaransa basabye ko iperereza ku wahanuye indege ya...

Uru rubanza rumaze igihe ndetse rutuma u Rwanda rutarebana neza n’ u...
14 October 2018 Yasuwe: 1470 2

Umusirikare warasiye umuntu I Nyamirambo n’abo bareganwa bakatiwe gufungwa...

Abantu batatu bakurikiranweho kugira uruhare mu iyicwa rya nyakwigendera...
8 October 2018 Yasuwe: 1356 0

Ubushinjacyaha ntiburamenya niba bujuririra irekurwa rya Diane Rwigara na...

Ubushinjacyaha bukuru bw’ u Rwanda bwatangaje ko bugiye kwicara bugasoma...
5 October 2018 Yasuwe: 1109 0

Diane Rwigara na nyina Adeline Rwigara barekuwe by’ agateganyo

Urukiko rukuru kuri uyu wa 5 Ukwakira 2018 rwafashe icyemezo cyo kurekura...
5 October 2018 Yasuwe: 6597 0