Minisiteri y’Ubuzima yatangaje ko uyu munsi tariki ya 07 Mutarama 2020,abantu batatu bahitanywe na COVID-19 bituma umubare w’abamaze kwicwa n’iki cyorezo ugera kuri 220,mu gihe abanduye bo biyongereyeho 114 bakagera ku 16,451. Abarembye ni 22.

Sponsored Ad

Abamaze gukira biyongereyeho 295 bagera ku 12,342.Abakirwaye ni 3,889

Minisante yagize iti "Twihanganishije imiryango y’abagore babiri b’imyaka 79 (Kayonza), 38 (Kigali) n’umugabo w’imyaka 66 (Kigali) bitabye Imana."

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Hatangajwe ko urukingo rwakozwe na sosiyete ikora imiti ya AstraZeneca hamwe na Kaminuza ya Oxford, rudafite ubushobozi buhagije bwo guhashya ubwoko bushya bwa Coronavirus bwagaragaye muri Afurika y’Epfo.

Kuri uyu wa Gatandatu ikinyamakuru Financial Times cyatangaje ko ubushakashatsi bw’ibanze bwakozwe na Kaminuza ya Witwatersrand yo muri Afurika na Kaminuza ya Oxford ku rukingo rwa AstraZeneca bwagaragaje ko rudahangana ku buryo bukomeye n’ubwandu bushya bwa Covid-19.

Mu bantu 2000 bakoreweho ubushakashatsi barimo abafite ubuzima bwiza n’abakiri bato, nta n’umwe wapfuye ariko ntabwo urukingo rwagaragaje kugira icyo rubafasha mu kutandura.

Umuvugizi wa AstraZeneca yatangaje ko nabo babonye ko urukingo rwabo rudatanga umusaruro uhagije ku bwoko bushya bwa Covid-19 yo muri Afurika y’Epfo, icyakora avuga ko bitagaragaza neza ishusho kuko bwakorewe ahanini ku bato n’abafite ubuzima bwiza.

Icyakora, AstraZeneca yatangaje ko bizera ko urwo rukingo rushobora guhangana n’ubwoko bushya bwa Covid-19 kuko rukoze mu bintu bimwe n’urukoze izindi nkingo zagaragaje ko zihangana n’ubwo bwoko bushya.

Ubwoko bushya bwa Covid-19 buhangayikishije abashakashatsi harimo ubwiswe ubwa Afurika y’Epfo, ubwo mu Bwongereza n’ubwo muri Brésil.