Umuntu umwe yahitanywe na COVID-19 bituma umubare w’abamaze kwicwa n’iki cyorezo ugera kuri 283 mu gihe abanduye bo biyongereyeho 68. Abarembye ni 9, naho abakize ni 102
Hakingiwe abantu 3.990
Amakuru yose kuri Covid-19 kuri uyu wa Gatatu:
Habonetse abanduye bashya:68 Abanduye bose:20,480 Hakize:102 Abakize bose:18,906 Hapfuye:1(Umugore w’imyaka 87 wapfiriye i Kigali) Abamaze gupfa bose babaye:283 Abakirwaye:1,291 Abarembye:9 Abakingiwe bashya:3,990 Abamaze gukingirwa kuva (...)

Sponsored Ad

Umuntu umwe yahitanywe na COVID-19 bituma umubare w’abamaze kwicwa n’iki cyorezo ugera kuri 283 mu gihe abanduye bo biyongereyeho 68. Abarembye ni 9, naho abakize ni 102

Hakingiwe abantu 3.990

Amakuru yose kuri Covid-19 kuri uyu wa Gatatu:

Habonetse abanduye bashya:68
Abanduye bose:20,480
Hakize:102
Abakize bose:18,906
Hapfuye:1(Umugore w’imyaka 87 wapfiriye i Kigali)
Abamaze gupfa bose babaye:283
Abakirwaye:1,291
Abarembye:9
Abakingiwe bashya:3,990
Abamaze gukingirwa kuva 05/3/2021:321,698.

Nyuma y’uko ibihugu 21 bihagaritse urukingo rwa Coronavirus bitewe ko kwikanga ko rwaba ruteza ikibazo cyo kuvura kw’amaraso, bamwe mu bahanga mu by’ubuvuzi n’inkingo bari kuvuga ko icyemezo cyafashwe n’ibihugu byiganjemo ibyo mu Burayi cyo guhagarika urukingo rwa AstraZeneca kidafututse.

Kugeza ubu, ibihugu 21 byamaze guhagarika urwo rukingo bitewe n’uko rukekwaho gutera kuvura kw’amaraso mu mitsi, ndetse no kwifunga kw’inzira zigeza amaraso mu bwonko.

Ku bwa Micheal Head, impuguke akaba n’umushakashatsi muri Kaminuza ya Southampton mu Bwongereza, asanga ibikorwa byo guharika urukingo muri ibi bihe kandi nta bimenyetso bishyigikira icyo cyemezo ari ukwibeshya.

Yagize ati ‘’Kuri uyu munota, nta mpamvu mbona yatuma ibihugu bihagarika itangwa ry’urukingo rwa AstraZeneca, mu kuri nta bwo byumvikana. Ziriya nkingo zishinzwe kuturinda iki cyorezo, hari impamvu yihutirwa zikwiye gutangwa, rero guhagarika izo nkingo nta mpamvu ifatika ihari ni icyemezo kibi’’.

Mu minsi ishize, Ikigo cyita ku ndwara zirimo izo kuvura kw’amaraso, ISTH, cyari cyatangaje ko nta huriro rigaragara ry’uko AstraZeneca itera ikibazo cyo kuvura kw’amaraso.

Mu itangazo bashyize hanze, bagize bati ‘’Umubare muto w’abagize ibibazo byo kuvura kw’amaraso ugeranyije na miliyoni z’abantu zahawe urukingo, ntugaragaza ko hari ihuriro rihari mu buryo bwumvikana. Hashingiwe ku makuru ahari, ISTH yizera ko ibyiza byo kwikingiza biruta kure ibyago byo kutikingiza, ndetse yewe no ku bantu basanzwe bafite indwara zo kuvura kw’amaraso’’.

Ku bwa Jon Gibbins ukuriye Ishami ry’ubushakashatsi ku ndwara z’umutima n’izo mu nda muri Kaminuza ya Reading mu Bwongereza, yavuze ko n’ubundi bidatangaje kuba abantu bakuru bagira ibibazo byo kuvura kw’amaraso, kuko n’ubundi bari mu bafite ibyago byinshi byo kurwara izo ndwara.

Yagize ati ‘’Iyo utangiye gukingira abantu benshi, biba bishoboka ko bamwe bagira ibyo bibazo [byo kuvura kw’amaraso], ariko ntibivuze ko baba babitewe n’urukingo’’.

Michael Head yongeyeho ko ikindi gishobora kuba kiri gutera ibibazo, ari uko urukingo rwa Coronavirus rwabanje guhabwa abantu bakuru mu Burayi, kandi ari icyiciro gifite ibyago byinshi byo kugira ibibazo birimo kuvura kw’amaraso.

Yagize ati "Mu bantu bari guhabwa urukingo mu Burayi aho ikingira rikiri mu ntangiriro, ni abantu bakuru n’abasanganywe izindi ndwara karande. Ubwo rero wakiteze kubona abantu bafite ibibazo byo kuvura kw’amaraso muri icyo cyiciro cy’abantu’’.

Yongeyeho kandi ko atumva impamvu ibihugu byahagarika urukingo kandi na Coronavirus ubwayo itera ibibazo birimo kuvura kw’amaraso, ati "Icyo tuzi neza ni uko abantu banduye Coronavirus, cyane cyane abajya mu bitaro kubera iyo ndwara, bafite ibyago byinshi byo kugira ibibazo byo kuvura kw’amaraso’’.

AstraZeneca itangaza ko mu bantu miliyoni 17 bahawe urukingo mu Burayi, 37 gusa ari bo bagaragaje ibibazo byo kuvura kw’amaraso yabo.

Ikigo Gishinzwe kugenzura Imiti mu Burayi, EMA, kiri gukora ubushakashatsi ku ihuriro rya AstraZeneca no kuvura kw’amaraso, n’ubwo cyasabye ibihugu gukomeza gutanga urukingo rwa AstraZeneca.

Ishami ry’Umuryango w’Abibumbye ryita ku Buzima, OMS, naryo ritangaza ko rikiri gukora iperereza, ariko risaba ibihugu ‘gutuza’ kandi bigakomeza gutanga inkingo.

U Bubiligi n’u Bwongereza biri mu bihugu byavuze ko bizakomeza gutanga urukingo rwa AstraZeneca, bitewe n’uko nta bimenyetso by’ingaruka urwo rukingo rugira ku barutewe.