Minisitiri w’Ubuzima,Dr Ngamije Daniel,yavuze ko ingaruka ziri kuvugwa ku rukingo rwa AstraZeneca rwatewe abanyarwanda benshi ntazo barabona ndetse nabo bari kubyumva I Burayi.

Sponsored Ad

Byinshi mu bihugu byo ku mugabane w’I Burayi byamaze guhagarika urukingo rwa AstraZeneca kubera ko ngo rutera ikibazo cyo kwipfundika kw’amaraso bikaba byanatera urupfu.

Minisitiri Ngamije yabwiye RBA ko mu bantu benshi batewe uru rukingo mu Rwanda nta n’umwe rwagizeho ingaruka ndetse byaba ikibazo abakingiwe benshi rubagizeho ingaruka.

Ati “Hari ibihugu by’Iburayi byavuze ngo turakeka ko hari ibibazo turi kubona mu baturage byatewe n’urukingo bashobora kuba barabonye.Ni ikibazo cy’ubushakashatsi bari kwibaza.Ese kugira ngo amaraso y’uyu muntu yipfundikanye byatewe no guhabwa uru rukingo?.Nicyo kibazo kiri kubazwa abashakashatsi.Mu kugizubiza harabanzwa gukorwa ubushakashatsi kugira ngo harebwe ko igihe watewe uru rukingo rwa AstraZeneca uba ufite ibyago byo kugira amaraso yipfundika bigaragara hatarimo gukeka kandi bigaragara ku mubare munini w’abarutewe.

Mu gihe ubushakashatsi butarakorwa hashobora kubaho amahurirane y’ibintu.Ese abaturage batarakingirwa,ikibazo cy’amaraso avura akipfundika mu mitsi gisanzwe kiriho?.Uri gusanga mu bakingiwe n’abatakingiwe icyo kibazo gisanzwe kiriho.Ntabwo kiri kwiyongera mu itsinda ry’abakingiwe.Kiramutse cyiyongereye mu bakingiwe nibwo wavuga uti rwa rukingo ruri gutera ibibazo.”

Minisitiri Ngamije yavuze ko u Rwanda rugendera ku mabwiriza y’umuyango w’Abibumbye ndetse bategereje ibirava mu nama zakozwe n’impuguke za OMS ku bushakashatsi bwakozwe kuri uru rukingo rwa Astrazeneca.Yemeje ko u Rwanda ruzafunga uru rukingo igihe byategekwa na OMS.

Minisitiri Ngamije yavuze kandi ko inkingo za COVID-19 u Rwanda rwakiriye mu minsi ishize, ubu izirenga 90 zimaze gukoreshwa, aho abarenga ibihumbi 300 bamaze gukingirwa.

Minisitiri Ngamije avuze kandi ko kuba abantu bakingiwe bitavuze ko bagomba kwirara ntibubahirize amabwiriza yo kwirinda. Avuga ko inkingo icyo zimaze ari ukurinda abantu kurembywa na COVID19. Bikaba bisaba ko uwakingiwe yitwararika kugira ngo atanduza abandi.

Hari umubare muto w’abantu bagize ikibazo cyo kwipfundika kw’amaraso, bivugwa ko babigize nyuma yo guterwa urwo rukingo.

OMS ariko yashishikarije ibihugu kudahagarika gukingira, mu gihe ibihugu byinshi bikomeye byo mu muryango w’Ubumwe bw’Uburayi (EU/UE) byabaye bihagaritse ikoreshwa ry’uru rukingo.

OMS yavuze ko nta gihamya iragaragaza y’isano hagati y’urwo rukingo no kwipfundika kw’amaraso.

Ikigo cy’Uburayi cyo kugenzura imiti (EMA) cyakoze inama kuri uyu wa kabiri, kandi byitezwe ko kizatangaza imyanzuro yacyo ku wa kane kuri uru rukingo. Nacyo cyavuze ko urukingo rwa AstraZeneca rukwiye gukomeza gukoreshwa.