Kigali

Muhanga: Ruswa mu itangwa ry’inzu zari zigenewe abarokotse Jenoside

Amakuru   Yanditswe na: Iyamuremye Janvier 26 January 2018 Yasuwe: 779

Bamwe mu barokotse Jenoside bo mu Karere ka Muhanga bemeza ko batishoboye bavuga ko kuva iyi Jenoside yarangira kugeza magingo aya nta macumbi bafite mu gihe bayemerewe inshuro nyinshi, ngo n’aherutswe gutangwa bavuga ko ruswa yiganjemo kugirango abafite amafaranga babe aribo bazihabwa.

Bavuga ko bagiye babeshywa inshuro nyinshi ko bazahabwa inzu amaso agahera mu kirere, ngo batangiye kwishima babonye akarere ka Muhanga kari kubaka inzu bumva ko bazazihabwa ariko ngo byarangiye zihawe abandi.Umwe mu bagombaga guhabwa inzu waganiriye na TV1 ducyesha iyi nkuru yagize ati :”Imyaka 23 irarangiye umuntu atagira aho yikinga.Ugasanga buri gihe bakagushyira ku rutonde.Ejo bwaka ngo ntabwo uriho.”

Undi nawe ati :”Ikibazo dufite twe abacitse ku icumu n’uko hari abitabwa ho abandi bagatereranwa,Bamwe barubakiwe bahabwa inka z’abacitse ku icumu ariko hakabamo abandi bantu tubaza ikibazo cyacu tukabona tumeza nka ho tutacitse ku icumu.”

Hari umugore wavuze ko yavukiye I muhanga ariko ko imyaka ishize nta cumbi agira.Avuga ko no kwikodeshereza inzu atabishoye kandi ngo iki kibazo hashize imyaka 11 akigejeje ku buyobozi bw’akarere ka Muhanga.

Kimwe mu byababaje cyane aba bacitse ku icumu rya Jenoside bemeza ko batishoboye, ni ukuba mu minsi ishize bamwe muri bo barashyizwe ku rutonde rw’ abagombaga guhabwa inzu mu mudugudu w’ icyitegererezo uherereye ahitwa I Munyinya mu mujyi wa Muhanga ariko bikarangira zihawe abandi barimo n’ abishoboye ndetse banasanzwe bafite izindi.

Umwe avuga ko yashyizwe ku rutonde rw’abazahabwa inzu nk’umukene wa nyuma nk’uko abyivugira,yabwiwe ko ajya gukora isuku ku nzu ye ajyayo ariko avanwa ku rutonde akigerayo.Ahamya ko abahawe inzu nta mukene urimo kuko benshi mubazihawe bafite Television, ibipangu basanganwe n’ibindi bikoresho by’abantu bakize, ngo uretse umuntu umwe azi urwaye mu mutwe abandi bose barishoboye.

Hari n’abandi bavuga ko bamwe mu bahawe izo nzu baturuka mu zindi ntara nta n’ibyangombwa batswe kugirango bahabwe izo nzu.Hari uwatanze urugero avuga ko hari umugore asanzwe azi ko acuruza amazu ariko ngo yabaye uwa mbere mu bahawe inzu yo guturamo, uyu anahamya ko harimo ruswa mu itangazwa ry’izo nzu ‘ziriya nzu zatanzwe ikibazo cyanjye cyaragezeyo.Hari undi mugore bita redamuta yari afite amazu agurisha.Ni we wabanje kujya mu nzu.Naravuze nti ahari baziha abafite amafaranga ngirango babaha ruswa.”

Mukatagana Fortune, Vice Mayor ushinzwe imibereho myiza y’abaturage atangaza ko inzu bazitanze bagendeye ku rutonde bahawe,ati :”Buriya hari urutonde tuba twarakoze nk’akarere kandi tugakorana n’association zivugira abarokotse ari AVEGA ku karere dufite abo twahaye ari IBUKA ku rwego rwa Karere twabikorereye ho tujya no kubasura.Hari itsinda ryari ririmo Dasso,ryari ririmo Polisi ryari ririmo IBUKA n’akarere.Abantu twahaye inzu twarabasuye nk’itsinda ntabwo byakozwe n’umuntu umwe.Nta muntu n’umwe wari ku rutonde ngo tumuvaneho.”

N’ ubwo bigoye kumenya uruhande rufite ukuri , hagendewe ku kuntu izi nzu zubakiwe abacitse ku icumu rya Jenoside yakorewe abatutsi mu karere ka Muhanga zimeze, n’ aho zubatse biragoye kubona utayifuza.

Ikindi aba bagenerwakorwa b’ ikigega gishinzwe gutera inkunga abacitse ku icumu rya Jenoside batishoboye bo muri Muhanga bashinja ubuyobozi bw’ aka karere ni ukubambura ibibanza biguriye ubwabo babwirwa ko buzabaha inzu cyangwa se buzabubakira bikarangira muri ibi byose nta na kimwe babonye.

Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Imodoka yavaga mu mugi yerekeza Nyabugogo yataye umuhanda igonga abantu 7...

Polisi y’ u Rwanda ishami rishinzwe wo mu muhanda yavuze ko imodoka yo mu...
11 January 2019 Yasuwe: 4430 0

Umunyamideli w’umunyarwandakazi witeguraga gukora ubukwe vuba yapfuye...

Umunyamideli wari warabigize umwuga Alexia Uwera Mupende yitabye Imana ku...
9 January 2019 Yasuwe: 4533 0

Mukangendahayo Joselyne arwaye uburwayi budasanzwe butuma aruka ibikeri,...

Mukangendahayo Joselyne, umukobwa utuye mu mudugudu wa Rusasa mu kagari ka...
31 December 2018 Yasuwe: 4610 0

Uyu mubyeyi arashinja abaganga bo mu bitaro bya Muhima kumurangarana...

Ibitaro bya Muhima mu Mujyi wa Kigali birimo gukurikirana ikibazo cy’umugore...
26 December 2018 Yasuwe: 2795 1

Musanze: Hari imiryango yaboneje urubyaro igirwaho Ingaruka n’uburyo...

Mu Karere ka Musanze mu ntara y’Amajyaruguru hari imiryango itifujwe...
22 December 2018 Yasuwe: 1277 0

Komisiyo y’Abakozi ba Leta yasabye Minisante kwirukana abakozi bayo batanze...

Mu ibaruwa yo ku italiki 5/11/2018 Komisiyo y’abakozi ba Leta yandikiye...
20 December 2018 Yasuwe: 10663 6