Kigali

Polisi y’u Rwanda irihanangiriza abatwara ibinyabiziga bafite uburangare

Amakuru   20 April 2017 Yasuwe: 647 0

Polisi irihanangiriza abatwara ibinyabiziga kwirinda uburangare, aho ivuga ko abakora ayo makosa bazajya bakurikiranwa bagahanwa ndetse bakamburwa n’impushya zabo zo gutwara ibyo binyabiziga.

Ibi bije bikurikira impanuka ebyiri zabaye ku italiki ya 18 Mata zihitana ubuzima bw’abantu batanu .

Impanuka imwe yabereye mu murenge wa Nduba mu karere ka Gasabo ihitana ubuzima bw’abantu bane barimo n’umushoferi ubwo ikamyo yari atwaye yaburaga feri maze igonga abana batatu bavaga ku ishuri.

Umuvugizi wa Polisi ishami rishinzwe umutekano wo mu muhanda, Chief Inspector of Police (CIP) Emmanuel Kabanda akaba avuga ko impanuka nyinshi ziterwa n’uburangare bw’abashoferi aho yihanangiriza abica amategeko agenga umuhanda.

Aha CIP Kabanda agira ati:” Twabwiye kenshi abakoresha umuhanda, cyane abatwara imodoka n’abamotari kubahiriza amategeko y’umuhanda n’imikoreshereze yawo, kwirinda kuvugira kuri telefoni batwaye , kwihuta bageze mu makorosi, kwirinda umuvuduko ukabije n’uburangare bundi..”

Yakomeje agira ati:” Biri mu nyungu z’utwaye ikinyabiziga kuba yakubahiriza ibisabwa kuko uretse abo batwaye, nabo baba bashyira ubuzima bwabo mu kaga ndetse n’ibinyabiziga byabo; utwaye rero ajye ashyira ubuzima imbere.”

Polisi iragira inama kandi ba nyir’ibinyabiziga kujya bitwararika ubuziranenge bwabyo no kujya bakoresha igenzura mu gihe kiba kigenwe kugira ngo birinde impanuka zabyo.

Iteka rya Perezida no.85/01 ryo kuwa 02 Nzeli 2002, rivuga ku mategeko y’umuhanda n’imikoreshereze yawo, rivuga ko imodoka itujuje ubuziranenge busabwa, idahabwa icyangombwa kiyemerera kugenda mu mu muhanda; uyikoresha idafite icyo cyangombwa acibwa ihazabu y’amafaranda 25,000.”

Iriya kamyo ifite icyapa kiyiranga RAD 731J ni iy’ikigo cy’ubwubatsi niyo yagonze inzu yari yegereye umuhanda mu murenge wa Nduba nyuma yo kugonga abana batatu, ariko nta muntu yasanze muri iyo nzu.

CIP Kabanda yasabye abakoresha umuhanda kwitonda bakubahiriza amategeko y’umuhanda kuko impanuka zishobora kwirindwa.

Polisi y’u Rwanda yasabye abashoferi bafite ibinyabiziga bitwara abagenzi ko mu modoka zabo hashyirwamo utugabanyamuvuduko dutuma imodoka itarenza umuvuduko wa kilometero 60 mu isaha.

Kuri uwo munsi nanone, indi mpanuka yabereye mu murenge wa Kageyo mu karere ka Gicumbi; aho imodoka itwara abagenzi yo mu bwoko bwa Coaster ifite icyapa kiyiranga RAD 792 B yagonze uwitwa Ganishyaka Aloys ahita yitaba Imana. Polisi ikaba yaravuze ko byatewe n’uburangare bw’umushoferi.

Umuvugizi w’Ishami rya Polisi y’u Rwanda rishinzwe umutekano wo mu muhanda yagize ati:” gutwara ikinyabiziga bisaba ubwitonzi no gushishoza, kuko iyo bitagenze gutyo bishyira ubuzima bw’umushoferi ndetse n’abo atwaye mu kaga. Polisi y’u Rwanda yashyizeho ingamba zitandukanye zo gukumira izo mpanuka harimo gushyira abapolisi hirya no hino mu mihanda bashinzwe kugenzura ko amategeko y’umuhanda yubahirizwa , ariko kandi hari abashoferi bamwe bakomeje kubirengaho”.

Yakomeje agira ati:” impanuka nyinshi zishobora kwirindwa kuko akenshi ziterwa no kugenda nabi mu muhanda ndetse n’uburangare, hakaniyongeraho no gutwara ibinyabiziga bitameze neza bitanakorewe isuzumwa ry’imiterere yabyo. Hari kandi n’ubwo abanyamaguru nabo bateza impanuka mu gihe bambuka umuhanda uko biboneye batashishoje”.

Ibitecyerezo

  • Amategeko n'amabwiriza birkurikizwa

Inzindi nkuru

Remera: Yakubiswe na bagenzi be bamugira intere ngo abatwara...

Umusore uri mukigero cy’ imyaka 28 ukora umurimo wo gucuruza m2u yakubiswe...
7 July 2017 Yasuwe: 5881 1

Umukobwa wari uzwi ku izina rya Judith yaguye Nyabugogo mu modoka itwara...

Umukokobwa witwa Judith uri mu kigero cy’ imyaka 20 yaguye mu modoka ya...
6 July 2017 Yasuwe: 14374 20

Rutsiro: Umwarimu arashinjwa kunyereza amata yagenewe abanyeshuri

Umwarimu w’imyaka 42 wigisha ku Kigo cy’amashuri abanza cya Nyabirasi mu...
2 July 2017 Yasuwe: 381 0

Ruhango: Ishuri ryasubijwe mudasobwa 27 zibwe

Polisi y’u Rwanda ikorera mu karere ka Ruhango yasubije ikigo cy’Uburezi...
2 July 2017 Yasuwe: 116 0

Kamonyi: Umusore arakekwaho kwica nyina babanaga mu nzu

Umusore w’ imyaka 29 arakekwaho kwica nyina babanaga mu murenge wa Mugina...
26 June 2017 Yasuwe: 1875 1

Rusizi: Abantu bitwaje intwaro barashe abaturage umwe ahasiga ubuzima 8...

Umwe yitabye Imana, abandi 8 barakomereka nyuma y’ uko abantu bataramekana...
20 June 2017 Yasuwe: 3154 4