Umuraperi Bushali yaserukanye n’umuhungu we Bushali Moon mu gitaramo cya "Rap City" cyitabiriwe n’ibyamamare mu njyana ya Hip Hop ndetse n’abakunzi b’iyi njyana.

Sponsored Ad

Ni igitaramo cyabaye ku mugoroba wo ku wa Gatandatu tariki 17 Nzeri 2022 muri Bk Arena kitabirwa n’ibyamamare mu njyana ya Hip Hop ndetse n’abakunzi b’iyi njyana.

Iki gitaramo cyateguwe na Banki ya Kigali ku bufatanye na QA Venue Solutions icunga inzu ya BK Arena mu rwego rwo gukomeza gukorana n’urubyiruko biciye mu myidagaduro.

Abacyitabiriye batashye banyuzwe n’umuziki w’abaraperi batandukanye barimo Riderman, Bushali, Oda Paccy, Fireman, Bulldogg, Ish Kevin, Dope Zilha, Kivumbi King, Angel Mutoni n’abandi.

Bushali wari ukumbuwe cyane, yazanye umuhungu we, Bushali Moon ku rubyiniro, abafana bibakora ku mutima.

Bushali yagize ati “Umuhungu wanjye yifuzaga kubasuhuza! Vuba aha na we aratangira kubaha ibihangano bye!”

Iyi mfura ya Bushali yamaze umwanya munini ku rubyiniro yanyuzagamo agasimbuka yishimira indirimbo za se na B-Threy.

Moon yabonye izuba muri Gashyantare mu 2021, ni umwana uyu muraperi yabyaranye n’uwiyita Pontesiano ku mbuga nkoranyambaga, na we wari mu gitaramo aherekeje umukunzi we n’umwana wabo.