Ku munsi w’ejo nibwo ikipe ya Rayon Sports yatangiye imyitozo yo kwitegura umukino wa ¼ cya CAF Confederations Cup bafitanye na Enyimba FC muri Nigeria gusa abakinnyi 10 nibo bayikoze gusa mu gihe abandi bavuze ko bazayikora ari uko bongerewe amasezerano ndetse bahawe amafaranga baberewemo n’buyobozi.

Sponsored Ad

Nubwo abakinnyi barimo Yannick Mukunzi, Muhire Kevin, Rutanga Eric, Rwatubyaye Abdul na Manzi Thierry bari mu ikipe y’igihugu,bamwe mu bakinnyi ba Rayon Sports banze kwitabira imyitozo kubera ko ubuyobozi butarabongerera amasezerano ngo bubahe n’amafaranga.

Muri iyi myitozo yabaye ku munsi w’ejo ku wa Kane,abakinnyi barimo Mutsinzi Ange, Manishimwe Djabel,Niyonzima Olivier, Bimenyimana Bonfils Caleb na Bashunga Abouba banze kuyikora badahawe amafaranga mu gihe abagera ku 10 barimo Mugabo Gabriel, Christ Mbondi, Nova Bayama, Nyandwi Saddam, Mugisha François Master, Nzayisenga Kassim, Mugisha Gilbert, Prosper Donkor Kuka, Irambona Eric na Twagirayezu Innocent nibo bayigararayemo.

Gatera Moussa niwe wakoresheje imyitozo yo ku munsi w’ejo gusa yavuze ko ubuyobozi bwaganirije abakinnyi batabonetse mu minsi iri imbere bazagaruka.

Mutsinzi Ange, Manishimwe Djabel na Bashunga Abouba bahakaniye ubuyobozi ko batazakora imyitozo cyangwa ngo bakine mu gihe batarumvikana ku masezerano mashya ngo banahabwe amafaranga nk’uko amakuru dukesha IGIHE abitangaza.

Umutoza mukuru wa Rayon Sports Roberto Oliveira Goncalves do Carmo azagera mu Rwanda kuri uyu wa Gatandatu,kugira ngo akomeze gutyaza abakinnyi bazitware neza muri uyu mukino.