Ikipe ya Misiri yanganyije na Ghana ibitego 2-2 mu gikombe cya Afurika mu gihe Cote d’Ivoire yatsindiwe mu rugo igitego 1-0 na Nigeria yafatwaga nk’idakanganye.

Sponsored Ad

Ikipe ya Ghana yari ikomeye mu kibuga kubera abakinnyi beza babanje mu kibuga,yari gutsinda Misiri ariko uburangare bw’abakinnyi bayo buyikoraho cyane.

Abakinnyi babiri ba Ghana nibo bihereye imipira yavuyemo ibitego bya Misiri byatumye umutoza wayo arakara utanze igitego akamukuramo.

Ku munota wa 45,Rutahizamu Mohamed Salah yavunitse ku ruhande rwa Misiri asimburwa na Mostafa Fathi,abakunzi ba Misiri barahangayika.

Ku munota wa 3 wongewe kuri 45 y’umukino,rutahizamu Mohamed Kudus uhagaze neza cyane kuva mu ikipe ya Westham mu Bwongereza,yatsinze igitego cya mbere cya Ghana kiba ari nacyo kiboneka mu gice cya mbere.

Mu gice cya kabiri,Ghana yagarutse yugarira cyane ndetse ntiyagaragaza inyota yo gushaka ikindi gitego cy’intsinzi.

Kubera kugarira,Rutahizamu Iñaki Williams yahawe umupira aho kuwukina asatira awusubiza inyuma,awihera umukinnyi Omar Marmoush yishyurira Misiri nyuma yo gusiga ba myugariro ba Ghana.

Ibi byababaje umutoza wa Ghana,ku munota wa 73 ahita akuramo uyu Williams azana Osman Bukari.

Icyakora ku munota wa 71,Mohamed Kudus yatsindiye Ghana igitego cya kabiri ku mupira yahawe na Odoi ahita yinjira mu rubuga rw’amahina awushyira mu rushundura.

Ntibyatinze ku munota wa 74,Osman Bukari winjiye mu kibuga asimbuye,nawe atakaza umupira,Trezeguet arawutwara awuha Mostafa Mohamed ahita atsindira Misiri igitego cya kabiri.

Umutoza Hughton wa Ghana yababajwe n’uku gutakaza umupira kwa Bukari ku munota wa 89 amukura mu kibuga atitaye ko yinjiye asimbuye.

Umukino warangiye amakipe yombi anganya ibitego 2-2.

Misiri yahise igira amanota abiri mu mikino ibiri yo mu Itsinda B mu gihe Black Stars ya Ghana ari iya nyuma muri iryo tsinda rya CAN 2023 n’inota rimwe mu mikino ibiri.

Kuri uyu wa Gatanu saa Kumi, Cap-Verde yatsinze Ghana irakina na Mozambique.

Ku rundi ruhande,Cote d’Ivoire iri mu rugo ndetse yahabwaga amahirwe yo kwegukana iki gikombe,yatengushye abafana bayo itsindwa na Nigeria yari imaze iminsi iri hasi,igitego 1-0.

Iki gitego cyabonetse ku munota wa 54 w’umukino gitsinzwe na William Trost Ekong,kuri penaliti yatanzwe hifashishijwe VAR nyuma y’uko Diomande akiniye nabi Victor Osimhen mu rubuga rw’amahina.

Nigeria yatsinze Côte d’Ivoire igitego 1-0, igira amanota ane mu Itsinda A rya CAN 2023 aho iyanganya na Guinée équatoriale.

Côte d’Ivoire ifite amanota atatu mu gihe Guinée Bissau yamaze gusezererwa kuko ifite zeru mu mikino ibiri kandi hasigaye umwe.

Ikipe ya Nzalang Nacional ya Guinée équatoriale yatsinze ibitego 4-2 Guinée Bissau,ihita yiyongerera amahirwe yo kujya mu kindi cyiciro.

Muri uyu mukino,Emilio Nsue López yabaye umukinnyi wa mbere utsinze ibitego bitatu mu mukino wa CAN kuva mu 2008.

Yabaye umukinnyi wa mbere ukuze utsinze "hat-trick" muri CAN ndetse ni nawe mukinnyi utsinze hat-trick mu mateka y’ikipe ya Guinée équatoriale.

Umusifuzi w’Umunyarwanda, Uwikunda Samuel yayoboye uyu mukino w’igikombe cya Afurika warangiye Guinée équatoriale itsinze Guinea-Bissau ibitego 4-2 asifura hagati.