Ikipe ya Maroc yari mu itsinda rimwe n’u Rwanda ikananirwa kurutsinda,yageze ku mukino wa nyuma yandagarije Cameroon imbere y’abakunzi bayo aho yabatsinze ibitego 4-0 mu gihe Mali nayo yageze ku mukino wa nyuma itsinze Guinea kuri penaliti 5-4.

Sponsored Ad

Guhera mu mukino wa 3 wo mu itsinda C,ikipe ya Maroc yagiye itsinda ibitego birenze 2 none kuri uyu wa 3 yanyagiye Cameroon ibitego 4-0 iri imbere y’abakunzi bayo I Limbe.

Ibitego bya Maroc byatsinzwe na Soufiane Bouftini, Soufiane Rahimi watsinze 2 na Mohamed Bemammer watsinze icya nyuma.

Rahimi yahise ayobora urutonde rw’abamaze gutsinda ibitego byinshi muri iyi CHAN 2020 kuko ubu afite 5.

Cameroon yari imbere y’abafana bayo yaruhijwe kuva ku munota wa 1 kugeza kuwa nyuma kuko igice cya mbere cyarangiye ari 2-0.

Igice cya kabiri byabaye ibindi bindi kuko Maroc yaje yariye karungu irayirusha karahava kugeza ubwo iyongeyemo ibindi 2.

Ku mukino wa nyuma wo mu itsinda C,Maroc yanyagiye Uganda ibitego 5-2,muri ¼ itsinda irusha Zambia ibitego 3-1 hanyuma muri ½ yanyagiye Cameroon ibitego 4-0.

Iyi Maroc ishobora kwisubiza iyi CHAN kuko muri 2018 nabwo ariyo yayitwaye inyagiye Nigeria kuri Final ibitego 4-0.

Mu wundi mukino wa ½ wabaye,Mali yanganyije 0-0 mu minota 120 hitabazwa penaliti zahiriye abanya Mali binjije 5-4.Uwahushije iya Guinea ni Morlaye Sylla wasezereye u Rwanda.

Umukino wa nyuma wa CHAN uzakinwa ku cyumweru.