Rayon Sports yo n’andi makipe yageze mu mukino ya ¼ cy’irangiza mu mikino ya CAF Confederations Cup 2018 baratomborera muri Continental Hotel iherereye Cairo mu Misiri,uyu munsi saa kumi n’imwe z’I Kigali na Cairo nkuko CAF yabitangaje.

Sponsored Ad

Rayon Sports iraba iri mu gakangara ka mbere iri kumwe n’andi makipe 43yabaye aya kabiri ariyo Al Masry,AS Vita Club na CARA Brazaville aho araza gutomborana n’amakipe 4 yabaye aya mbere mu matsinda.

Buri kipe yabaye iya mbere iraza kuba ifite agakangara ihagarariye,karaza kuba karimo udupira 3 turimo izina ryayo gusa.

Uyu munsi nibwo Rayon Sports imenya ikipe bazahurira 1/4 cy’irangiza

Mu gutombora ababishinzwe barafata ikipe yo mu gakangara ka mbere bayitangaze,bafate agapira kamwe muri buri dukangara tundi turimo amakipe yabaye aya mbere,uretse akarimo ikipe yari kumwe n’iyo bari kumwe mu itsinda, hanyuma banjye kutuvangira mu gakangara ka 6 karaba karimo ubusa bazihuze.

Ni ukuvuga ngo Rayon Sports nijya gutombora barafata agapira kamwe ko mu gakangara ka 2 karimo RAJA Casablanca,bafate kamwe ko mu gakangara ka 3 gahagarariwe na RS Berkane,bafate na kamwe mu gakangara ka 4 gahagarariwe na Enyimba gusa ntibarakora mu gakangara ka 5 gahagarariwe na USM Alger yari kumwe na Rayon Sports mu itsinda.

Nibamara gufata agapira kamwe muri buri gakangara, baratuvangira mu gakangara ka 6 karimo ubusa,batangaze uko amakipe azahura muri ¼ cy’irangiza aho Rayon Sports izabanza kwakira i I Kigali ikipe iratombora, mu mukino ubanza uteganyijwe ku wa 14 Nzeri uyu mwaka.

Amateleviziyo y’ibihugu biturukamo aya makipe yageze muri 1/4 yemerewe kwerekana iyi tombora ndetse iraca imbonankubone ku rubuga rwa You Tube rwa CAF arirwo CAF TV.

Rayon Sports ifite amahirwe menshi yo gutombora imwe mu makipe atatu ariyo Raja Casablanca,Enyimba FC na RS Berkane muri iyi tombola ya saa kumi n’imwe zo kuri uyu wa Mbere Taliki ya 03 Nzeri 2018.