Ikipe y’Igihugu y’u Rwanda “Amavubi” yagumye ku mwanya wa 139 ku rutonde rwa Nzeri rw’Ishyirahamwe rya Ruhago ku Isi, FIFA.
Uru rutonde rwasohotse ku wa Kane, tariki 21 Nzeri 2023. Mu mikino u Rwanda rwakinnye muri uku kwezi, rwanganyije n’Ikipe y’Igihugu ya Sénégal igitego 1-1 mu rugendo rwo gushaka itike y’Igikombe cya Afurika kizabera muri Côte d’Ivoire mu ntangiriro z’umwaka utaha.
Ibi ni byo byatumye iyi kipe iguma ku mwanya wa 139 aho ifite amanota 1087.03 bityo ikaba yaragabanutseho amanota 2.43.
Muri rusange Ikipe y’Igihugu ya Uganda iyoboye andi yo mu Karere ka Afurika y’Iburasirazuba aho ikurikiwe na Kenya, Tanzania, mu gihe u Rwanda rukurikiranye n’u Burundi.
Muri Afurika, amakipe 10 ya mbere ayoboye andi ni Maroc, Sénégal, Tunisia, Algeria, Misiri, Nigeria, Cameroun, Mali, Côte d’Ivoire na Burkina Faso.
Ku rwego rw’Isi, Ikipe y’Igihugu ya Argentine yicaye ku mwanya wa mbere, ikurikiwe n’u Bufaransa, Brésil, u Bwongereza n’u Bubiligi ku mwanya wa gatanu.
Leave a Reply
Your email address will not be published. Required fields are marked *