Mu mukino rukumbi w’umunsi wa 24 wa shampiyona wabaye kuri uyu wa Mbere,ikipe ya APR FC yanyagiye Amagaju FC ibitego 6-0 mu mukino wabereye kuri stade ya Kigali I Nyamirambo.

Sponsored Ad

APR FC yagiye mu kibuga izi ko nitsinda irahita ijya imbere ya AS Kigali yayirushaga inota rimwe,yakoze ibyo yasabwaga n’abakunzi bayo,inyagira Amagaju FC ari kurwana no kuguma mu cyiciro cya mbere ibitego 6-0.

Hakizimana Muhadjiri niwe wafashije APR FC kurangiza igice cya mbere iyoboye, kuko yafunguye amazamu ku munota wa 42 w’umukino,kirangira ari igitego 1-0.

Mu gice cya kabiri, APR FC yakubise Amagaju itababariye, ndetse ibitego byisuka nk’imvura kuko abasore nka Issa Bigirimana yongeyemo 2,Sekamana Maxime ashyiramo igitego acyinjira mu kibuga asimbuye Byiringiro Lague,Twizerimana Onesme nawe winjiye mu kibuga asimbuye yabonye igitego.

APR FC ishimangiye bidasubirwaho ko yo na AS Kigali ariyo makipe ari ku murongo ubanza mu gushaka igikombe cya shampiyona mu gihe Kiyovu Sports na Rayon Sports ziri gukura nk’isabune.

APR FC ihise iyobora urutonde rwa shampiyona n’amanota 47,ikurikiwe na AS Kigali ifite umukino ku munsi w’ejo na Kiyovu ifite 45 mu gihe Kiyovu Sports ari iya 3 n’amanota 38,Rayon Sports n’iya 4 n’amanota 37.

Abakinnyi babanje mu kibuga ku mpande zombi:
APR FC: Ntaribi Steven, Herve Rugwiro, Aimable Nsabimana, Omborenga Fitina, Emmanuel Imanishimwe, Djihad Bizimana, Buteera Andrew, Issa Bigirimana, Hakizimana Muhadjiri, Iranzi Jean Claude (c) na Byiringiro Lague.

Amagaju FC: Pacifique, Noel (c), Egide, Celestin, Hussein, Jean Luc, Tresor, Munezero, Hassan, Innocent, na Bodo.