Ikipe ya APR FC yanyagiye Gorilla FC ibitego 4-1,biyifasha kongera kugaruka mu bihe byiza no gushimangira umwanya wa mbere, nyuma y’imikino 2 yari ishize inganya.

Sponsored Ad

Iyi APR FC yari yasuye Gorilla FC mu mukino w’umunsi wa 14 wabereye kuri Kigali Pelé Stadium kuri uyu wa Gatanu tariki 8 Ukuboza 2023.

Uyu mukino wa Shampiyona y’u Rwanda watinzeho iminota 41 kubera irushanwa rihuza amakipe y’abadepite bo mu Nteko Zishinga Amategeko zo mu Karere ka Afurika y’Iburasirazuba.

APR FC yaje ishaka gutsinda byanze bikunze, yabonye igitego cya mbere ku munota wa 31,gitsinzwe na Nshimirimana Ismaïl Pitchou ku mupira yateye n’umutwe,uragenda ukubita igiti cy’izamu uboneza mu rushundura.

Igice cya mbere cyarangiye APR FC iyoboye umukino n’igitego kimwe cyatsinzwe na Nshimirimana Ismaël "Pitchou".

Mu gice cya kabiri,APR FC yaje igifite gahunda,bituma ku munota wa 58 ibona igitego cyatsinzwe na Victor Mbaoma ku mupira yahawe na Omborenga Fitina.

Gorilla FC yaje kwisubiraho,ibona igitego cya mbere ku munota wa 67 cyatsinzwe na Mavugo Cedric ku mupira yari ahawe na Nsengiyumva Mustapha.

Ku munota wa 77,Victor Mbaoma yatsinze igitego cya gatatu ku mupira yaherejwe na Ruboneka Jean Bosco.

Ku munota wa 85, Apam Bemol Assongwe yashyizemo igitego cya kane ku ruhande rwa APR FC,ku mupira yari ahawe na Ruboneka Bosco.

Umupira warangiye APR FC itsinze ibitego 4-1,bwa mbere muri shampiyona ya 2023/24.APR FC yakomeje kuyobora urutonde rwa shampiyona n’amanota 30

Victor Mbaoma yatsinze igitego cya 10 muri shampiyona mu mikino 14.

Mu mikino 6 iheruka guhuza APR FC na Gorilla, APR yayitsinze yose.

Indi mikino yabaye uyu munsi Police FC yatsinze Etoile del’Est 3-0, Sunrise FC itsinda Amagaju 2-1.

Imikino iteganyijwe kuri uyu wa Gatandatu:

AS Kigali v Rayon Sports
Musanze FC v Marines

Urutonde

1. APR FC 30pts
2. Police 28pts
3. Rayon Sports 26pts
4. Musanze FC 26pts