Ikipe ya Arsenal yatsinzwe ku nshuro ya mbere muri Premier League nyuma yo gutsindirwa ku kibuga cyayo na Aston Villa ibitego 2-0 mu gihe Liverpool bari basangiye kuyobora shampiyona nayo yatsindiwe mu rugo na Crystal Palace.

Sponsored Ad

Kuri iki cyumweru,ibintu byabaye bibi kuri aya makipe yari ayoboye kuko yabonye amahirwe menshi yo gutsinda ibitego ariko ba rutahizamu bayo barayatenguha aratsindwa.

Emery wirukanwe na Arsenal nyuma y’amezi 18 gusa asimbuye Arsene Wenger nk’umutoza, yayitsinze inshuro ebyiri muri iyi shampiyona ndetse ishobora kuyitesha gutwara igikombe cya Premier League.

Ikipe ya Arsenal yabonye umwanya wo gusimbuza Manchester City ku mwanya wa mbere ariko ibitego bya Leon Bailey na Ollie Watkins byayikuye ku gikombe.

Ikipe ya Arsenal yari yaruhije Aston Villa mu gice cya mbere ariko ikipe ya Emery yayisubiriye mu gice cya kabiri.

Umutoza wa Arsenal Arteta yakoze impinduka mu ikipe yabanzaga aho Jorginho na Martinelli babanje hanze biyigora kubona ibitego no kuyobora imikino.

Bailey yatsinze igitego cya mbere ku munota wa 84 mu gihe Watkins yatsinze igitego cya kabiri ku munota wa 87.

Arsenal iri kwitegura umukino wa Bayern Munich,wo kwishyura muri 1/4 cya Champions League aho ubanza banganyije ibitego 2-2.

Ku rundi ruhande,Liverpool yatsindiwe mu rugo na Crystal Palace igitego 1-0 cya Mateta,ihusha uburyo bwinshi cyane imbere y’izamu,byatumye itsindwa.

Man City yahise isiga izi kipe kuko yatsinze Luton ibitego 5-1.Man City ishobora gutwara iki gikombe ku nshuro ya kane yikurikiranya.

Arsenal yagumye ku mwanya wa kabiri n’amanota 71 inganya na Liverpool mu gihe Man City ariyo iyoboye n’amanota 73.Bose basigaje imikino itandatu yo gukina.

Ku rundi ruhande,Bayer Leverkusen yanyagiye Werder Bremen ibitego 5-0, yegukana Igikombe cya Shampiyona y’u Budage, bwa mbere mu mateka yayo mu gihe habura imikino itanu.

Iyi kipe itaratsindwa mu mikino 29, irusha Bayern Munich ya kabiri amanota 16.