Ikipe ya Arsenal yagarutse neza muri shampiyona yari imaze iminsi 43 idakinwa itsinda West ham ibitego 3-1 mu mukino warebwe n’umunyabigwi wayo Arsene Wenger wayitoje imyaka isaga 20.
Ibitego bya Bukayo Saka, Gabriel Martinelli na Eddie Nketiah byatumye Arsenal ibona amanota 3 nyuma y’uko yari yabanjwe igitego mu gice cya mbere.
Arsenal yakinnye umukino wo ku rwego rwo hejuru ndetse mu guhererekanya umupira ikagera ku kigero kirenga 70% yerekanye ko uyu mwaka ishikamye mu rugamba rwo (...)

Sponsored Ad

Ikipe ya Arsenal yagarutse neza muri shampiyona yari imaze iminsi 43 idakinwa itsinda West ham ibitego 3-1 mu mukino warebwe n’umunyabigwi wayo Arsene Wenger wayitoje imyaka isaga 20.

Ibitego bya Bukayo Saka, Gabriel Martinelli na Eddie Nketiah byatumye Arsenal ibona amanota 3 nyuma y’uko yari yabanjwe igitego mu gice cya mbere.

Arsenal yakinnye umukino wo ku rwego rwo hejuru ndetse mu guhererekanya umupira ikagera ku kigero kirenga 70% yerekanye ko uyu mwaka ishikamye mu rugamba rwo gushaka shampiyona.

Ikipe ya Arsenal yakinnye uyu mukino idafite Gabriel Jesus wavunitse ndetse na Zinchenko wabanje hanze.Abo bombi basimbuwe na Eddie Nketiah na Kieran Tierney.

Arsenal yafunguye amazamu ku munota wa 4 ku gitego cyari gitsinzwe na Bukayo Saka ariko umusifuzi yemeza ko habayemo kurarira nubwo amashusho yagaragaje ko bitabaye.

Nketiah yabonye amahirwe yo gufungura amazamu mbere y’uko igice cya mbere kirangira ku mupira wari uturutse kuri counter attack ariko ananirwa gutera mu izamu.

Ikipe ya West ham yakoraga ku mupira inshuro nke cyane,yaje kubona penaliti ku munota wa 27,nyuma y’aho Jarrod Bowen yacenze William Saliba hanyuma amutegera mu rubuga rw’amahina.

Iyi penaliti yinjijwe neza na Said Benrahma bifasha Westham kuyobora igice cya mbere cyarangiye ifite igitego 1-0.

Icyakora Arsenal nayo yahawe penaliti iki gice kigiye kurangira,ubwo byakekwaga ko myugariro Aaron Cresswell yagaruye n’akaboko umupira wari utewe na Odegaard ariko VAR yerekanye ko yakoresheje umutwe,penaliti iteshwa agaciro.

Mu gice cya kabiri,Arsenal yaje imeze cyane bituma ibasha gutahana amanota yose ndetse irusha cyane West ham.

Ku munota wa 53,Arsenal yafunguye amazamu ku gitego cyatsinzwe na Bukayo Saka ku mupira wari utewe na Odegaard ashaka gushota ariko ugenda buhoro ufatwa n’uyu rutahizamu awushyira mu izamu.

Bidatinze ku munota wa 58,Declan Rice yambuwe umupira na Saka hanyuma awuha Odegaard nawe wawuhaye Granit Xhaka wahise uwusunikira Martinelli wari winjiye neza ahita atsinda igitego cya kabiri ateye ku ruhande umunyezamu yari ahagazemo.

Nketiah ushidikanywaho ko yasimbura Gabriel Jesus,yatsinze igitego cya 3 ku munota wa 69 w’umukino,nyuma yo guhabwa umupira na Odegaard acenga myugariro Thilo Kehrer awuboneza mu nshundura.

Arsenal yabonye amanota 3 yatumye ikomeza kuba ku mwanya wa mbere n’amanota 40,ikurikirwa na Newcastle ifite 33 mu gihe Man City ya 3 ifite 32.

Uyu mukino warebwe na Arsene Wenger watoje Arsenal imyaka 22 ariko akeguzwa n’abakunzi bayo bamwamaganaga kubera ko nta bikombe yari agitwara.

Ntabwo yigeze agaruka kureba iyi kipe kuva yatoza umukino we wa nyuma muri Gicurasi 2018.

Ku rundi ruhande,Liverpool nayo yagarutse mu kibuga aho yatsinze Aston Villa ibitego 3-1 bya Salah,Van Dijk n’umwana muto witwa Bajcetic.

Tottenham yanganyije na Brentford ibitego 2-2 mu gihe Newcastle yanyagiye Leicester ibitego 3-0.

Arsene Wenger yagarutse kureba Arsenal nyuma y’imyaka 4 ayivuyemo