Mu mukino wo kwishyura wa 1/32 cya UEFA Europa League,ikipe ya Arsenal yarokotse hamana ikipe ya Benfica Lisbon yo muri Portugal kuko yayitsinze igitego cy’intsinzi ku munota wa 87 ibifashijwemo na kapiteni wayo Pierre Emerick Aubameyang.

Sponsored Ad

Arsenal yari yanganyije na Benfica igitego 1-1 mu mukino ubanza,yayitsinze ibitego 3-2 mu mukino wo kwishyura yari yakiriye mu Bugereki nyamara kugera ku munota wa 87 amakipe yombi yanganyaga 2-2 ndetse iyi kipe yo mu mujyi wa London iri hafi gusezererwa itabarwa na Aubameyang.

Ku munota wa 21 w’umukino,Arsenal yafunguye amazamu ku gitego cyatsinzwe na Pierre-Emerick Aubameyang ku mupira mwiza cyane yahawe na Bukayo Saka uhetse iyi kipe muri iki gihe.

Benfica yarushwaga mu gice cya mbere,yabonye igitego cyo kwishyura ku munota wa 43 w’umukino kuri coup Franc yatewe neza na Diogo Goncalves nyuma y’ikosa Ceballos yakoreye Weigl wa Benfica.Igice cya mbere cyarangiye ari 1-1.

Mu gice cya Kabiri,Arsenal yagarutse mu kibuga ifite imbaraga nk’izo mu gice cya mbere ariko ntigaragaze ubushake bwo gutsinda igitego byatumye umutoza wa Benfica yinjiza mu kibuga ba rutahizamu 3 bo kumufasha guhindura umukino.

Ku munota wa 61 w’umukino,Benfica yiherewe igitego na Dani Ceballos wari ku rwego rwo hasi muri uyu mukino,washatse guhereza umupira umunyezamu we Leno awihera Rafa Silva niko kugenda asigarana n’izamu ashyiramo igitego.

Iki gitego cyari kigejeje Benfica muri 1/16 ariko yaje kurangara gato Kierney Tierney ayishyura ku munota wa 67 biba ibitego 2-2.

Kugeza kuri uyu munota,Benfica yari ifite amahirwe yo gukomeza ariyo mpamvu yagiye kugarira izamu ikajya icungira ku mipira Arsenal itakaje.

Ibi byaje kuyibyarira ibibazo kuko ku munota wa 87,Bukayo Saka yaje kuyiba umugono akata umupira mwiza mu rubuga rw’amahina usanga Aubameyang aho yari ahagaze atsindira Arsenal igitego cy’intinzi kiyikuye ku gisuzuguriro yagize umwaka ushize ubwo yasezererwaga na Olympiacos muri iki cyiciro.

Ku rundi ruhande,amakipe yo mu Bwongereza yose yakomeza uretse Leicester City yakuwemo na Slavia Prague ku bitego 2-0 mu mikino yombi.

Tombola ya 1/16 cya Europa League iraba kuri uyu wa Gatanu tariki ya 26 Gashyantare 2021.

Amakipe yose yageze muri 1/16 cya UEFA Europa League:

AC Milan, Ajax, Arsenal, Dinamo Zagreb, Dynamo Kyiv, Granada, Manchester United, Molde, Olympiacos, Rangers, Roma, Shakhtar Donetsk, Slavia Praha, Tottenham Hotspur, Villarreal, Young Boys

Uko imikino yose yaraye igenze:

Manchester United 0-0 Real Sociedad (Agg 4-0)
Rangers 5-2 Antwerp (9-5)
Leicester 0-2 Slavia Prague
Villarreal 2-1 Salzburg (agg: 4-1)
Hoffenheim 0-2 Molde (agg: 3-5)
Napoli 2-1 Granada (agg: 2-3)
Shakhtar 1-0 Maccabi Tel-Aviv (agg: 3-0)
Ajax 2-1 LOSC Lille (agg: 4-2)

Club Brugge 0-1 Dynamo Kyiv (agg: 1-2)
AC Milan 1-1 Crvena zvezda (agg: 3-3, Milan yatsinze ku gitego cyo hanze)
Roma 3-1 Braga (agg: 5-1)
Dinamo Zagreb 1-0 Krasnodar (agg: 4-2)
Leverkusen 0-2 Young Boys (agg: 3-6)
PSV Eindhoven 2-1 Olympiacos (agg: 4-5)