Umutoza Thierry Froger utoza APR FC n’abo bakorana batumijwe mu nama idasanzwe n’ubuyobozi bw’ikipenyuma yo gutsindwa ibitego 6-1 na Pyramids FC yo mu Misiri.

Sponsored Ad

Biravugwa ko uyu mutoza na bagenzi be bashobora guhambirizwa nyuma yo gusezererwa nabi muri Caf Champions League.

Umutoza Thierry Froger utishimwe n’abakunzi ba APR FC kuva yatsindwa na Rayon Sports ibitego 3-0 ikamutwara igikombe cya Super Cup,ashinjwa gupanga nabi ikipe mu mikino y’ingenzi.

Ku wa Gatandatu, tariki ya 30 Nzeri 2023, ni bwo abakinnyi, abayobozi n’abandi bajyanye na APR FC mu mukino wo kwishyura w’ijonjora rya kabiri rya CAF Champions League bageze ku kibuga cy’indege cya Kigali.

Mu mukino wabaye ku mugoroba wo ku wa 29 Nzeri 2023,ku kibuga cya gisirikare cyitiriwe 30 Kamena (30 June Stadium),kiberaho imikino Pyramids yakiriye,APR FC yinjijwe ibitego bine na rutahizamu Mostapfa Fathi ibindi bibiri bitsindwa na Walid Al-Karti na Mohamed Al-Shaibi. Ni mu gihe kimwe rukumbi yabonye cyashyizwemo na Victor Mbaoma kuri penaliti.

Uburyo APR FC yasezerewe nabi kandi yari yaritwaye neza mu mukino ubanza wabereye mu Rwanda, byaherukaga kuyibaho mu myaka 17 ishize.

Amakuru aravuga ko ubuyobozi bwa APR FC bushobora gufata umwanzuro wo kwirukana uyu Mufaransa.