Ikipe yakiriye igikombe cya AFCON 2021 Kameruni yageze muri kimwe cya kabiri cy’iki gikombe nyuma yo gutsinda Gambia ibitego 2-0 kuri Stade Japoma i Douala ku mugoroba wo kuri uyu wa gatandatu.
Karl Toko Ekambi niwe wabaye intwari ya Cameroon, atsinda ibitego bibiri hakiri kare igice cya kabiri kigitangira bituma igihugu cye gitera intambwe ikomeye.
Ikipe ya Cameroon yari imbere y’abafana bayo, yatangiye umukino iri hejuru mu gihe Gambia itatinze kwerekana ko yaje ije kugarira ikareba ko (...)

Sponsored Ad

Ikipe yakiriye igikombe cya AFCON 2021 Kameruni yageze muri kimwe cya kabiri cy’iki gikombe nyuma yo gutsinda Gambia ibitego 2-0 kuri Stade Japoma i Douala ku mugoroba wo kuri uyu wa gatandatu.

Karl Toko Ekambi niwe wabaye intwari ya Cameroon, atsinda ibitego bibiri hakiri kare igice cya kabiri kigitangira bituma igihugu cye gitera intambwe ikomeye.

Ikipe ya Cameroon yari imbere y’abafana bayo, yatangiye umukino iri hejuru mu gihe Gambia itatinze kwerekana ko yaje ije kugarira ikareba ko yakomeza kuri za penaliti.

Hakiri kare ku munota wa 15,Cameroon yabuze igitego ubwo Nicolas Moumi Ngamaleu yakase umupira mwiza usanga Vincent Aboubakar mu rubuga rw’amahina awuteye n’agatsinsino ukorwaho na myugariro wa Gambia ujya hanze.

Ku minota 29, Collins Fai yagerageje amahirwe ye ku mupira yatereye kure ariko umupira uca hejuru y’izamu rya Baboucar Gaye .

Nyuma y’iminota 2 gusa,Aboubakar nabwo yibye umugono myugariro wa Gambia atera umupira n’umutwe uca gato ku ruhande.

Ku munota wa 36,Aboubakar yabonye amahirwe akomeye ubwo bamuhaga umupira mu rubuga rw’amahina wenyine,awuteye umutwe umunyezamu wa Gambia awugaruza urutugu.

Cameroon yakomeje kotsa igitutu ariko igice cya mbere nticyayihira kirangira ari 0-0.

Igice cya kabiri kigitangira ku munotawa 50 gusa, Fai yateye umupira mwiza wavuye iburyo usanga Karl Toko Ekambi ahagaze neza ahita wushyira mu nshundura,Cameroon iba iyoboye umukino.

Gambia icyibaza ibiyibayeho,yahise itsindwa igitego cya kabiri ku munota wa 56,nacyo cyatsinzwe na Karl Toko Ekambi bituma iyi kipe iri mu rugo iyobora n’ibitego 2-0.

Cameroon yakomeje kuyobora umukino ndetse mu minota ya nyuma yashoboraga kubona igitego cya 3 ubwo Clinton Njie yahabwaga umupira asigarana n’umunyezamu ananirwa kumuroba,umupira ugarukiye Karl Toko Ekambi awutera nabi.

Cameroon yatsinze ibitego 2-0,izahura n’izarokoka hagati ya Misiri na Maroc (bazahura ejo nimugoroba muri kimwe cya kane kirangiza), muri kimwe cya kabiri kizabera Yaounde kuwa gatatu, 2 Gashyantare.

Mu wundi mukino wabaye kuri uyu wa Gatandatu,Burkina Faso yasezereye Tunisia iyitsinze igitego 1-0.

Dango Ouattara niwe watsinze iki gitego kimwe rukumbi cyabonetse muri uyu mukino wabereye kuri Stade Roumde Adjia i Garoua.

Uyu rutahizamu w’imyaka 19 yashyize umupira mu nshundura mu minota y’inyongera y’igice cya mbere gusa umukino ugiye kurangira yahawe ikarita y’umutuku kubera gukubita inkokora umukinnyi wa Tunisia.

Burkina Faso yakomeje izahura n’izarokoka hagati ya Senegal cyangwa Guinea Equatoriale (bazakina kuri iki cyumweru), muri kimwe cya kabiri kirangiza kizaba kuwa kane tariki 3 Gashyantare.