Ntibikiri ibihuha ikipe y’igihugu Amavubi izacakirana na Ethiopia mu mikino 2 ya kamarampaka mu gushaka itike ya CHAN 2018 aho umukino ubanza uzabera muri Ethiopia tariki ya 05/11/2017, uwo kwishyura wo uzabera i Kigali tariki ya 12/11/2017.

Sponsored Ad

Hari hashize iminsi bivugwa ko ikipe y’igihugu ishobora guhabwa amahirwe ya kabiri yo kongera gushaka itike yo kwerekeza mu mikino ya CHAN 2018 ndetse igomba gucakirana na Ethiopia mu mikino 2 ya kamarampaka,kuri ubu ntabwo bikiri ibihuha kuko ku munsi w’ejo FERWAFA nayo yarabyemeje ndetse amakipe yombi azacakirana mu mikino 2 izakinwa ku italiki ya 5 n’iya 12 Ugushyingo 2017.

Ku munsi w’ejo nibwo twabagejejeho abakinnyi 24 u Rwanda rwahagaye kugira ngo bitegure iyi mikino aho hahamagawe amasura mashya menshi nubwo umutoza mukuru w’ikipe y’igihugu Antoine Hey ataragera mu Rwanda kugira ngo abafashe kwitegura uyu mukino.

Ishyirahamwe ry’umupira w’amaguru CAF,ku munsi w’ejo nibwo ryandikiye FERWAFA ibaruwa yemeza ko iyi mikino izakinwa ndetse byongera guha amahirwe ya kabiri Amavubi yo kuba yakwerekeza mu mikino ya CHAN 2018 nubwo yari yasezerewe mu majonjora na Uganda ku bitego 3-2 mu mikino yombi.

Aya mahirwe abonetse nyuma y’aho Kenya yamburiwe kwakira iri rushanwa ikabura n’amahirwe yo kurikina aho yahise ahabwa Misiri ikanga kwitabira none asekeye u Rwanda na Ethiopia.

Muri iyi mikino ibiri, umukino ubanza uzabera muri Ethiopia tariki ya 05/11/2017, uwo kwishyura wo uzabera i Kigali tariki ya 12/11/2017.