Kuri uyu wa Gatatu taliki ya 11 Werurwe 2020 nibwo hari hateganyijwe umukino w’ikirarane wagombaga guhuza Manchester City na Arsenal ku kibuga Etihad,ariko wasubitswe kubera ko mu ikipe ya Arsenal hakekwamo Coronavirus.

Sponsored Ad

Mu byumweru 2 bishize,umuherwe nyiri ikipe ya Nottingham Forest na Olympiacos witwa Evangelos Marinakis yageze ku kibuga Emirates cya Arsenal ariko nyuma aza gusanganwa Coronavirus.

Uyu mugabo wari ku mukino ikipe ye ya Olympiacos yasezereyemo Arsenal iyitsinze ibitego 2-1 mu mukino wo kwishyura wa 1/32 cya Europa League wabaye kuwa 27 Gashyantare,yaje gusanganwa Coronavirus nyuma bituma FA igira amakenga ko yaba yarasuhuzanyije n’abo muri Arsenal akabasigira iki cyorezo.

Evangelos Marinakis yatangaje kuri uyu wa mbere ko basanze yaranduye Coronavirus,bitera FA guhagarika uyu mukino wa Arsenal yari gukina na Manchester City kubera ko uyu Mugereki yahuye na bamwe mu bakinnyi b’iyi kipe ya Arsenal ndetse n’abayobozi bayo, ku kibuga Emirates Stadium.

Arsenal yasohoye itangazo ivuga ko abakinnyi bayo bamwe bahuye n’uyu muherwe nyuma y’umukino bishyira mu kato ubwabo bakazagaruka mu myitozo kuwa Gatanu hashyize ibyumweru 2 bahuye na Bwana Marinakis.Ibi birakurikizwa no ku bayobozi 4 bayo bari bicaranye n’uyu Mugereki.

Arsenal yagize iti “Abakinnyi baraguma mu mago yabo kugeza iminsi 14 yagenwe irangiye.Abayobozi 4 bari bicaye hafi ya Marinakis nabo baraguma mu rugo kugeza iminsi 14 irangiye.”

Uku guha akato abakinnyi bahuye na Marinakis niko kwatumye ikipe ya Arsenal ivuga ko benshi mu bakinnyi bataboneka bituma abategura Premier League basubika umukino wayo na Manchester City ndetse abafana baguze amatike basabwa kuyagumana kugeza uyu mukino usubukuwe.

Umuherwe wa Olympiacos yasanganywe Coronavirus