Rutahizamu Cristiano Ronaldo wanduye Coronavirus mu cyumweru gishize ubu akaba ari mu kato mu mujyi wa Turin,yatangaje ko abantu bariye indyo yuzuye,bagakora siporo ndetse bakabona umwanya wo kota akazuba nta kabuza bakira iki cyorezo cyugarije isi.

Sponsored Ad

Uyu rutahizamu w’imyaka 35 yatangaje ko bantu badakwiriye gutinya Coronavirus ahubwo bagakoze ibikwiriye mu kuyirwanya bita ku mubiri wabo.

Uyu rutahizamu kandi yamaganye ibivugwa ko yishe amabwiriza yo kwirinda Covid-19 kubera gufata indege ikora nk’imbangukiragutabara akava muri Portugal ajya mu Butaliyani aho akina muri Juventus.

Yagize ati “Izuba rirafasha cyane.Abantu ntibabizi ariko rituma umuntu amererwa neza.Iyo mbonye amahirwe nota akazuba.I Turin biba bigoye ariko ngerageza gushaka iminota 20 na 30 nkicara ku izuba.

Ndabifuriza ubuzima bwiza kandi mbagira inama yo kudatinya icyorezo ahubwo mukacyubaha.”

Ronaldo yasubije Minisitiri wa siporo mu Butaliyani witwa Vincenzo Spadaforo wamushinje kwica amabwiriza ya Covid-19 ati “Nta bwiriza na rimwe nigeze nica.Ibyo bavuga byose n’ibinyoma.

Navuganye n’ikipe yanjye kandi dufite inshingano yo gukora ibintu byiza.Ibyakozwe byose twabiherewe uruhushya.”

Umubyeyi wa Cristiano,madamu Dolores yavuze ko umuhungu we ameze neza ndetse ngo amushyigikiye nubwo batari kumwe.