Umwongereza Ethan Vernon wa Soudal Quick-step yegukanye Agace ka Kabiri ka Tour du Rwanda nyuma yo gukoresha amasaha atatu, iminota 21 n’amasegonda 30 ku ntera y’ibilometero 132,9 kuva kuri Kigali Car Free Zone kugera i Gisagara.
Uyu mwongereza w’imyaka 22 ni we wegukanye Agace ka Kabiri ka Tour du Rwanda 2023 nkuko yabikoze kuri iki cyumweru yegukana agace ka mbere.
Arakomeza kwambara umwenda w’umuhondo kuko ni we umaze gukoresha ibihe bito kurusha abandi bose bahanganye.
Ikipe ya (...)

Sponsored Ad

Umwongereza Ethan Vernon wa Soudal Quick-step yegukanye Agace ka Kabiri ka Tour du Rwanda nyuma yo gukoresha amasaha atatu, iminota 21 n’amasegonda 30 ku ntera y’ibilometero 132,9 kuva kuri Kigali Car Free Zone kugera i Gisagara.

Uyu mwongereza w’imyaka 22 ni we wegukanye Agace ka Kabiri ka Tour du Rwanda 2023 nkuko yabikoze kuri iki cyumweru yegukana agace ka mbere.

Arakomeza kwambara umwenda w’umuhondo kuko ni we umaze gukoresha ibihe bito kurusha abandi bose bahanganye.

Ikipe ya Soudal-QuickStep ya Ethan Vernon yahanganye n’andi makipe ndetse ibasha kugarura abantu bose bari bagerageje gucika kugeza imugejeje i Gisagara ari mu mwanya mwiza ahita atsinda.

Vernon asanzwe asiganwa mu marushanwa akomeye ku mugabane w’Uburayi,ariyo mpamvu biri kumworohera gutsinda bagenzi be ahatambika.

Yakurikiwe n’abandi barimo Henok Mulueberhan wa Green Project Bardiani ndetse na Meijers Jeroen wa Terengganu Cycling Polygon. Kugeza ku mukinnyi wa 46, bose banganya ibihe kuko basoreje mu gikundi.

Chris Froome yabaye uwa 47 asizwe amasegonda umunani.

Muhoza Eric ukinira Bike Aid yabaye Umunyarwanda wasoreje hafi aba uwa 28 naho Niyonkuru Samuel wa Team Rwanda aba uwa 30. Manizabayo Eric yabaye uwa 34.

Tour du Rwanda 2023 izakomeza ku wa Kabiri, tariki ya 21 Gashyantare, hakinwa Agace ka Gatatu kazahagurukira i Huye kerekeza i Musanze ku ntera y’ibilometero 199,5

Tour du Rwanda imara icyumweru, abasiganwa bazenguruka ibice bitandukanye by’u Rwanda.

Mu mwaka wa 2019 Tour du Rwanda yavuye ku rwego rwa 2.2 ishyirwa kuri 2.1 y’amarushanwa ategurwa n’ishyirahamwe mpuzamahanga ryo gusiganwa ku magare, UCI.

Mu makipe akomeye ashobora kwegukana iri rushanwa harimo TotalEnergies yo mu Bufaransa, Green Project yo mu Butaliyani, Eritrea ndetse na Israel–Premier Tech ikinamo Chris Froome wabiciye bigacika mu kunyonga igare.

Afite ibigwi bikomeye kuko yegukanye irushanwa rya Tour de France inshuro enye, yegukana Giro d’Italia inshuro imwe na Tour d’Espagne yatwaye kabiri.