Ishyirahamwe ry’umupira w’Amaguru mu Rwanda (FERWAFA) ryafashe icyemezo cyo gusubika umukino w’umunsi wa mbere wo guhatanira igikombe cya Shampiyona wari guhuza Marines FC na Rutsiro FC kuri Stade Umuganda kuri iki Cyumweru,kubera iruka ry’ikirunga cya Nyiragongo ryatumye abatuye mu mujyi wa Goma bayihungiramo.

Sponsored Ad

Ubuyobozi bw’Akarere ka Rubavu bwaraye bwakiriye abaturage baturutse muri RDC bahungiye mu Rwanda, bubashyirwa muri Stade Umuganda byatumye iyi Stade itari bukinirweho kuri iki Cyumweru mu mukino wari gutangira saa cyenda.

Mu gitondo cyo kuri iki Cyumweru, FERWAFA yagize iti “Tubandikiye tubamenyesha ko umukino wari guhuza ikipe ya Marines FC na Rutsiro FC ku wa 23/05/2021 saa cyenda utakibaye bitewe n’impamvu zitunguraranye zijyanye n’ikirunga cyo muri Repubulika Iharanira Demokarasi ya Congo.”

Yasoje ivuga ko “Igihe umukino wimuriweho muzakimenyeshwa mu gihe kiri imbere.”

Ikirunga cya Nyiragongo cyacunshumuriye amazuku cyangwa amahindure (lava) mu kirere mu ijoro ryacyeye akora igicu gicucitse cy’ibara rya ’orange’ hejuru y’umujyi wa Goma, utuwe n’abaturage miliyoni ebyiri.

Ibihumbi by’abahatuye bahiye ubwoba bahitabatangira guhungira mu Rwanda, benshi muri bo bagendaga n’amaguru n’amaguru ariko mu gusubirayo u Rwanda rwabatije imodoka.

Icyo kirunga, kiri mu ntera ya kilometero 10 uvuye mu mujyi wa Goma, mu 2002 ni bwo cyaherukaga kuruka bikomeye kikangiza byinshi, ubwo cyicaga abantu 250 naho abandi bagera ku 120.000 bagasigara nta hantu bafite ho kuba.

Umuyobozi w’akarere ka Rubavu kegeranye n’umujyi wa Goma,Habyarimana Gilbert,yabwiye Radio Rwanda ko bamwe mu bari bahungiye ku Gisenyi batangiye gusubira iwabo kuko hagati mu ijoro ryacyeye icyo kirunga cyahagaritse kuruka.

Minisiteri ishinzwe ibikorwa by’ubutabazi yavuze ko u Rwanda rwaraye rwakiriye Abanye-Congo barenga bagera ku bihumbi 7000 bashaka ubuhungiro kubera iruka rya Nyiragongo.

Abahunze iruka ry’ikirunga cya Nyiragongo bacumbikiwe muri Stade Umuganda