Gutega ku mikino ‘Betting’ bimaze gufata indi ntera hirya no hino ku Isi, aho bamwe bahindura ubuzima bakava ku isuka bakagera ku rwego rwa Mirenge ku Ntenyo babikesha ubusesenguzi n’amahirwe mu kugaragaza uko imikino iri bugende, nubwo hari n’abandi bifuza byinshi bakabura na ducye bari bafite.
Inzozi zabaye impamo ku munyamahirwe w’Umunyakenya wagannye iduka rya sosiyete yitwa, SportPesa, agatega ku makipe 17 yose akamusekera bigatuma yegukana miliyoni ebyiri z’amadolari, ni ukuvuga asaga (...)

Sponsored Ad

Gutega ku mikino ‘Betting’ bimaze gufata indi ntera hirya no hino ku Isi, aho bamwe bahindura ubuzima bakava ku isuka bakagera ku rwego rwa Mirenge ku Ntenyo babikesha ubusesenguzi n’amahirwe mu kugaragaza uko imikino iri bugende, nubwo hari n’abandi bifuza byinshi bakabura na ducye bari bafite.

Inzozi zabaye impamo ku munyamahirwe w’Umunyakenya wagannye iduka rya sosiyete yitwa, SportPesa, agatega ku makipe 17 yose akamusekera bigatuma yegukana miliyoni ebyiri z’amadolari, ni ukuvuga asaga miliyari imwe na miliyoni 600 z’amafaranga y’u Rwanda.

Uyu munyamahirwe wakoze udupapuro tubiri kamwe agashyiraho amashilingi 100, yatangajwe kuri uyu wa kabiri muri resitora yitwa Carnivore iherereye Nairobi. Intsinzi ye ni imwe mu zikomeye muri Afurika zagaragayemo akayabo.

Itangazo rya SportPesa rivuga ko uyu munyamahirwe yatsinze ubwo Dijon FCO yanganyaga na Bordeaux 0-0 ku cyumweru nk’uko yari yabivuze.

Mu mezi abiri ashize abandi Banyakenya babiri, Quinter Chemei Nimo na Julius Kerich batsindiye miliyoni 62 z’amashilingi muri SportPesa isanzwe itera inkunga umwambaro wa Hull City yo mu cyiciro cya mbere mu Bwongereza.

Ikinyamakuru Daily Nation cyagereranyije aya mafaranga n’ibyayavamo, kigaragaza ko yavamo ishuri ry’imikino hagasaguka miliyoni 21 z’amashilingi. Ashobora guhemba Umunyakenya Victor Wanyama ukina muri Tottenham Hotspur amezi arindwi n’iminsi 11 kuko ku munsi ahembwa miliyoni imwe y’amashilingi.

Ashobora guhemba Michael Olunga ukina mu Bushinwa muri Guizhou Hengfeng Zhichen, amezi 18 kuko afata miliyoni 12 z’amashilingi ku kwezi.
Imikino y’amahirwe Betting imaze kwandika izina muri Kenya kugeza n’aho mu ngengo y’imari ya 2016/2017 Guverinoma yatangije politiki yo kujya isoresha amasosiyete ayikora 50% by’inyungu.