Harabura ukwezi ngo irushanwa rihuza amakipe ya mbere akomeye muri Afurika, Africa Football League, ritangire gukinwa ku nshuro ya mbere.

Sponsored Ad

Iri rushanwa rizitabirwa n’amakipe umunani ariyo Al Ahly (Misiri), Espérance Sportive de Tunis (Tunisia), Wydad Athletic Club (Maroc), Enyimba FC (Nigeria), Tout Puissant Mazembe (RDC), Atlético Petróleos de Luanda (Angola), Mamelodi Sundowns (Afurika y’Epfo) na Simba Sports Club (Tanzania).

Iri rushanwa rya mbere rizaba ririmo amafaranga menshi ku Mugabane wa Afurika, biteganyijwe ko buri kipe izaryitabira izahabwa ibihumbi 900$, izagera muri ½ ikazabona miliyoni 1.7$. Ni mu gihe izagera ku mukino wa nyuma izabona miliyoni 2.8$ naho izatwara igikombe ikazahabwa miliyoni 4$.

Muri rusange, iri rushanwa rizakinwa mu buryo bwo gukuranamo aho mu mikino ya ¼; ½ n’umukino wa nyuma hazakinwa umukino ubanza n’uwo kwishyura.

Ku ikubitiro, iyi mikino izatangira tariki 20 Ukwakira 2023, Simba SC yakira Al Ahly SC. Tariki 21 Ukwakira 2023, TP Mazembe ikine na Espérance de Tunis, mu gihe Petro de Luanda izakira Mamelodi Sundowns kuri iyo tariki.

Mu mukino ubanza uzasoza indi, Enyimba izakira Wydad Athletic Club tariki 22 Ukwakira 2023.

Biteganyijwe ko imikino ya ½ izakinwa tariki 29 Ukwakira na 1 Ugushyingo 2023. Ni mu gihe imikino ya nyuma iteganyijwe tariki 5 na 11 Ugushyingo 2023.