Nyuma y’uko Carlos Ferrer asezeye ku ikipe y’igihugu y’amavubi, haraye hashyizweho abandi batoza bashya b’agateganyo.

Sponsored Ad

Abatoza bashya harimo umufaransa Gérard Buscher, usanzwe ari Umuyobozi wa Tekiniki muri FERWAFA, yungirijwe na Jimmy Mulisa na Seninga Innocent. Ni bo bazatoza umukino wo gushaka Itike y’Igikombe cya Afurika cya 2023 uzahuza u Rwanda na Sénégal tariki ya 9 Nzeri 2023.

Aba batoza batowe ku munsi w’ejo hashize tariki ya 29 Kanama 2023 ,nyuma yo guterana kwa Komite Nyobozi y’Ishyirahamwe rya Ruhago mu Rwanda, FERWAFA.
Amavubi ari kwitegura Sénégal mu mukino uteganyijwe ku wa 9 Nzeri kuri Stade ya Huye.Biteganyijwe ko azinjira mu Mwiherero tariki ya 4 Nzeri 2023.

Sénégal, isanzwe itozwa na Aliou Cissé nk’Umutoza Mukuru, yo izahaguruka i Dakar ku wa 6 Nzeri mbere yo gucakirana n’Amavubi nyuma y’iminsi itatu. Izaba iyobowe n’abatoza barimo Pape Bouna Thiaw na Malick Daf.

Gérard Buscher yahawe Amavubi nyuma y’uko Umunya-Espagne, Carlos Alós Ferrer, aseshe amasezerano yari afitanye na FERWAFA muri Nyakanga 2023, akajya gutoza Ikipe y’Igihugu ya Bélarus.

Uyu Mufaransa w’imyaka 62 ukomoka muri Algérie, yakiniye amakipe menshi yo mu Bufaransa arimo Nice, Nantes, Brest, Montpellier, Matra Racing na Valenciennes.
Uyu mugabo wakinaga nka rutahizamu, muri rusange yakinnye imikino 402 atsindamo ibitego 111.

Gérard yakiniye Ikipe y’Igihugu y’u Bufaransa mu 1986-87, mu mikino ibiri yakinnye nta gitego yatsinze.

Urugendo rwe nk’umutoza, Gérard yarutangiriye muri Nice mu 2005, uyu mugabo kandi yatoje amakipe menshi yo muri Tunisie arimo CA Bizertin, AS Marsa, Stade Gabesien na CS Hammam-Lif aherukamo mu 2019.

Mu 2021 yabaye umutoza w’umusigire n’Umuyobozi wa Tekinike muri Mauritanie ari naho yanyuze mbere yo kugera mu Rwanda mu mpera za 2022.

Mu batoza bahawe kumwungiriza mu Amavubi harimo Mulisa Jimmy [wari usanganywe na Carlos] ndetse na Seninga Innocent utari ufite ikipe nyuma yo gutandukana na Sunrise FC yo mu Burasirazuba.

Aba batoza bahawe inshingano zo gutoza Amavubi no kuyafasha kwegukana amanota yo kuyahesha ikuzo kuko yamaze gusezererwa mu rugendo rwo gushaka Itike y’Igikombe cya Afurika cya 2023, kizabera muri Côte d’Ivoire mu ntangiriro z’umwaka w’imikino utaha.

Sénégal ni yo ya mbere mu Itsinda L n’amanota 13, yamaze kubona itike ya CAN 2023, Mozambique ya kabiri ifite amanota arindwi, Bénin ya gatatu ikagira atanu mu gihe u Rwanda ruri ku mwanya wa nyuma n’amanota abiri.