Guverinoma ya Canada yafashe icyemezo cyo kutohereza i Kinshasa abakinnyi bagombaga guhagararira imikino ihuza ibihugu bikoresha ururimi rw’Igifaransa igomba kuhabera.

Sponsored Ad

Biteganyijwe ko iyi mikino izaba hagati y’itariki ya 28 Nyakanga n’iya 08 Kanama 2023.

Canada yafashe icyemezo cyo kwanga kohereza muri Congo abakinnyi n’abahanzi bagombaga kuyihagararira muri iriya mikino ya La Francophonie, ku mpamvu z’umutekano.

Ibiro bya Minisitiri y’Ububanyi n’Amahanga w’iki gihugu, Martine Biron, byatangaje ko Quebec iha agaciro kanini iriya mikino, gusa kubera "impamvu z’umutekano n’iz’ubuzima ntabwo izohereza itsinda ry’abakinnyi ndetse n’abahanzi mu mikino ya La Francophonie izakinwa ku ncuro ya cyenda."

Biteganyijwe ko Canada izohereza i Kinshasa itsinda ry’abadipolomate bayo gusa.

Iki gihugu cyafashe iki cyemezo mu gihe mu minsi ishize cyari cyatangaje ko gishobora kutohereza abakinnyi bacyo muri Congo, bijyanye n’uko imirimo yo kubaka ibikorwa remezo bizifashishwa mu gihe cy’iriya mikino yarimo igenda biguru ntege.