Police FC yegukanye Igikombe cy’Intwari 2024 itsinze APR FC ibitego 2-1 ku mukino wa nyuma wabereye kuri Kigali Pele Stadium,urangira nabi kuko abakinnyi ba APR FC batishimiye imisifurire ku gitego cya Kabiri.

Sponsored Ad

Uyu mukino wabaye igitangaza,kuko abafana bari bakubise buzuye kuri Kigali Pele Stadium.

Nyuma yo gutsindwa mu mikino ibiri ya shampiyona y’uyu mwaka,Police FC yihimuye kuri APR FC iyitwara igikombe cy’Intwari.

APR FC niyo yafunguye amazamu ku gitego cyabonetse ku munota wa 13 gitsinzwe na Nshimiyimana Yunussu ku mutwe.

Ku munota wa 17,Umunyezamu Pavelh Ndzila yagonganye na Bigirimana Abeddy ntiyafata umupira, uyu mukinnyi wa Police FC ahita awutera mu izamu mu gihe Ndzila yari hasi, ku bw’amahirwe, Nshimiyimana Yunussu awukuriramo ku murongo n’umutwe.

Ku munota wa 25,APR FC yahushije igitego ku mupira wavuye muri koloneri,usanga Pitchou awushyira ku mutwe, ugeze kuri Niyigena Clement wari wenyine, arikaraga arawutera uca hejuru y’izamu.

Ku munota wa 43,Hakizimana Muhadjiri yahawe umupira ari mu rubuga rw’amahina, atera ishoti rikurwamo na Pavelh Ndzila.

Ku munota wa 45,Nsabimana Eric Zidane yateye ishoti rikomeye ari kure cyane, Umunyezamu Ndzila wa APR FC, agorwa no kuwukuramo.

Iminota 45 ibanza y’umukino wa nyuma w’Igikombe cy’Intwari 2024 yarangiye APR FC itsinze Police FC igitego 1-0.

Igice cya kabiri,Police FC yaje yahindutse igerageza gushaka igitego cyo kwishyura,ikibona ku munota wa 71,gitsinzwe na Peter Agblevor,ku mupira muremure yatsindishije umutwe uvuye kuri Akuki.

Ubwo umusifuzi yari amaze kongera iminota 5 kuri 90 y’umukino,Pitchou yahawe umupira ananirwa kuwuha mugenzi urarenga, abakinnyi bagenzi be bakekwaho ko yakorewe ikosa.

Umusifuzi wo ku ruhande,yibeshye yerekana ko ari uwo kurengurwa na APR FC nyamara wari warengejwe nayo byatumye umusifuzi wo hagati yerekana ko ari uwa Police FC.

Abakinnyi ba APR FC bari barangaye,Police ihita irengura vuba ibiba umugono,Peter Agblevor atsinda igitego cya kabiri.

Umukino wahagaze iminota umunani kubera ko abakinnyi ba APR FC batishimiye icyemezo cy’abasifuzi ku gitego cya kabiri cya Police FC cyatsinzwe na Peter Agblevor ku munota wa 90.

Abakinnyi ba APR FC barakaye cyane ndetse nyuma y’iki gitego amahirwe akomeye babonye mu rubuga rw’amahina bananiwe kuyakoresha.

Umukino warangiye Police FC itsinze ibitego 2-1.

Abasifuzi bavuye mu kibuga barinzwe n’abashinzwe umutekano.

Police FC yegukanye igikombe cya mbere nyuma yo gutwara icy’Amahoro mu 2015, irabona miliyoni 6 Frw naho APR FC ihabwe miliyoni 3 Frw.

Mu bagore, Igikombe cyegukanywe na AS Kigali yatsinze Rayon Sports igitego 1-0 mu mukino wabanje.

Ni u bwa mbere POLICE FC itwaye iki gikombe nyuma yo gutsindirwa ku mukino wa nyuma 2018.

Abatwaye igikombe cy’Intwari:

2017: APR FC
2018: RAYON SPORTS
2019: APR FC
2024: POLICE FC