Ikipe ya Kiyovu Sports yatsinze ibitego 2-1 Police FC mu mukino w’umunsi wa 23 wa shampiyona,ituma iyi kipe y’abashinzwe umutekano yuzuza imikino 8 yikurikiranya idatsinda.

Sponsored Ad

Muri uyu mukino wabereye kuri Kigali Pele Stadium,Kiyovu Sports imaze iminsi itameze neza kubera amikoro yatsinze iyi Police FC yaguze abakinnyi benshi ariko ntibayifashe.

Ku munota wa 2 gusa w’umukino,Kiyovu yafunguye amazaku ku gitego cyatsinzwe na Ndizeye Eric gusa kiza kwishyurwa na Djibrine Akuki ku munota wa 42.Amakipe yombi yagiye kuruhuka anganya igitego 1-1.

Ku munota wa 48,Alfred Leku yatsindiye igitego cy’intsinzi Kiyovu Sports,ahesha agahimbazamusyi bagenzi be.

Police FC yahoze irwanira umwanya wa mbere ntiratsinda umukino n’umwe mu munani imaze gukinwa mu mikino yo kwishyura ya shampiyona.

Abakinnyi ba Mashami Vincent bamaze gutsinda ibitego bitanu gusa mu mikino umunani, batsindwa 11.

Birasa n’aho iyi kipe ya Kacyiru muri uyu mwaka w’imikino ishaka guhanga amaso gutwara igikombe cy’amahoro aho basabwa kubanza kwikiza Gasogi United ya KNC yahigitse APR FC.

Kugeza ubu,APR FCyamaze gutera intambwe iyerekeza ku gikombe aho ifite amanota 49 n’imikino ibiri itarakina.Ikurikiwe na Rayon Sports ifite 42.Police ni iya 5 na 33 mu gihe Kiyovu Sports ari iya 6 na 31.

Mu wundi mukino,Etoile de L’Est yasanze AS Kigali mu mujyi iyihatsindira igitego 1-0.