Umurundi witwa Bipfubusa Joslin niwe mutoza mushya wa SC Kiyovu Sports asimbuye Umutoza Petros Koukouras uherutse gutandukana n’iyi kipe.

Sponsored Ad

Mu ijoro ryo ku wa Kabiri, tariki 21 Ugushyingo 2023 nibwo Kiyovu Sports yemeje ko yatandukanye n’umutoza Petros koukouras nyuma y’iminsi irindwi ayisezeyeho.

Mu Cyumweru gishize nibwo Koukouras yasabye Urucaca gutandukana nyuma y’amezi abiri adahembwa ndetse n’ubuzima bugoye buri muri iyi kipe.

Ibi byatumye Urucaca rwumvikana n’umutoza Bipfubusa Joslin watozaga ikipe ya Espoir FC mu mwaka w’imikino ushize.

Uyu mugabo wavutse tariki 10 Ukwakira 1984,yananyuze mu Rwanda nk’umukinnyi aho yakiniye amakipe nka Military Police, Kiyovu Sports na KIST.

Mu rugendo rwo gutoza, Joslin Bipfubusa yatoje amakipe arimo Aigle Noir, Le Messager Ngozi na Bumamuru FC.Yatoje kandi Kayanza United na Polisi ya Tanzaniya.

Yatoje kandi ikipe y’igihugu y’Uburundi mu batarengeje imyaka 20 ndetse aba umutoza wungirije mu Ntamba ku rugamba.

Bipfubusa Joslin yegukanye Igikombe cya Shampiyona muri Bumamuru FC.

Uyu mutoza w’umurundi yatowe nk’umutoza mwiza muri shampiyona y’u Burundi 2022-23

Ku munsi wa 11 wa Shampiyona, Kiyovu Sports izasura Sunrise FC tariki 25 Ugushyingo 2023.