Rayon Sports yanganyije na Kiyovu Sports igitego 1-1, itakaza amahirwe yo gusatira amakipe bahanganye ku gikombe cya shampiyona.

Sponsored Ad

Mu mukino w’umunsi wa 15 wabereye kuri Kigali Pele Stadium, Rayon Sports yongeye gutakaza amanota bituma APR FC bahanganye iyirusha amanota 6.

Kiyovu niyo yatangiye neza umukino aho ku munota wa 3,Alfred Leku yahawe umupira yinjiranye mu rubuga rw’amahina, ateye ishoti rikora kuri Rwatubyaye, umupira uca ku ruhande gato rw’izamu hatangwa koloneri.

Iyi koloneri yatewe, umupira usanga Muhozi Fred mu rubuga rw’amahina,ateye ishoti rifatwa na Tamale.

Ku munota wa 11,Luvumbu yacomekeye umupira Charles Bbaale awuhindura nabi, Esenu awukinishije umutwe ujya hanze.

Ku munota wa 12, Kiyovu Sports yafunguye amazamu ku mupira Kilongozi Richard yahinduye umupira mwiza mu rubuga rw’amahina, Bugingo Hakim awukuraho nabi usanga Chaliff Bayo atera ishoti rikomeye rijya mu izamu.

Ku munota wa 19,Kiyovu Sports yateye umupira mu rubuga rw’amahina, Rayon Sports igorwa no kuwukuraho, ku bw’amahirwe Tamale awuteresha nabi Muhozi ujya hejuru y’izamu.

Ku munota wa 23,Luvumbu yatanze umupira mwiza urenga abakinnyi b’inyuma ba Kiyovu Sports,usanga Bbaale utari waraririye ahagaze wenyine,awukinisha umutwe, ufatwa neza na Nzeyurwanda Djihad.

Ku munota wa 26,Rayon Sports yahushije uburyo bwabazwe,ubwo Bugingo Hakim yahinduraga umupira mwiza mu rubuga rw’amahina, Ojera Joackiam abanza kuwufunga, ateye ishoti ryo hasi ujya ku ruhande rw’izamu.

Ku munota wa 39, Luvumbu yateye umupira mu rubuga, Kanamugire Roger ananirwa kuwutera mu izamu,uca hejuru.

Ku munota wa 43,Muhire Kevin yahawe coup franc nziza cyane inyuma Gato y’urubuga rw’amahina, umupira awutera mu rukuta,Kiyovu Sports ihita iwutwara ariko ibuzwa kwinjira mu rubuga rw’amahina.

Ku munota wa 45,Luvumbu yahinduye umupira mwiza mu izamu, Nzeyurwanda agorwa no kuwufata ariko atuma Esenu atawutsinda, awukuraho.

Igice cya mbere cyarangiye Rayon Sports itsinzwe na Kiyovu Sports igitego 1-0.

Kiyovu Sports yatangije igice cya kabiri iri hejuru,ku munota wa 49,Mosengo Tansele yateye ishoti rikomeye ari kure, Umunyezamu Tamale Simon awushyira muri koruneri.

Ku munota wa 55,Luvumbu yinjiranye umupira mu rubuga rw’amahina, ateye ishoti rikurwamo na Djihad aryamye, ahita atabarwa na mugenzi we.

Ku munota wa 58,Esenu yahereje umupira Bbaale,wateye ishoti rinyura ku ruhande gato.

Ku munota wa 65, Luvumbu yateye umupira mwiza kuri coup franc, Nzeyurwanda Djihad arasimbuka awukoraho, awushyira muri koruneri.

Ku munota wa 77,Kilongozi yateye coup franc nziza,umupira ukubita umutambiko ujya hanze.

Ku munota wa 80, Luvumbu yazamukanye umupira wenyine awuha Tuyisenge Arsene wasigaye wenyine areba izamu awutera ku ruhande.

Ku munota wa 87,Ngendahimana Eric yatsinze igitego cyo kwishyura cya Rayon Sports n’umutwe ku mupira mwiza wahinduwe na Joackiam Ojera.

Nyuma y’iminota 90,hongeweho 5 yari akaga aho amakipe yombi yasatiranye imwe iva ku izamu rimwe indi ijya ku rundi.

Rayon Sports yanganyije na Kiyovu Sports igitego 1-1, yuzuza imyaka ine idatsinda Urucaca muri Shampiyona.

Gikundiro igize amanota 27 ku mwanya wa kane naho Kiyovu Sports isoza imikino ibanza ifite amanota 21 ku mwanya wa gatandatu.

Rayon Sports iheruka gutsinda Kiyovu Sports muri Shampiyona ku wa 1 Ukuboza 2019 ubwo yayitsindaga 1-0.