Uwahoze ari perezida wa Real Madrid witwa Lorenzo Sanz,wayiyoboye kuva 1995 kugeza muri 2000 yaraye apfuye yishwe n’icyorezo cya COVID-19,nkuko byatangajwe n’iyi kipe.

Sponsored Ad

Lorenzo Sanz wabaye Prezida wa Real Madrid imyaka 5,akayifasha gutwara UEFA Champions League inshuro 2 yapfuye yishwe na Coronavirus.

Uyu munya Espagne wari ufite imyaka 76 yari amaze iminsi mike arwaye nyuma yo gusanganwa COVID-19 ariko byarangiye imuhitanye.

Sanz yavukiye mu mujyi wa Madrid mu mwaka wa 1943 agera ku buyobozi bwa Real Madrid mu mwaka wa 1995 nyuma y’igihe ari director ku buyobozi bwa Ramon Mendoza.

Sanz niwe wazanye umutoza Fabio Capello hanyuma asinyisha abakinnyi bakomeye nka Roberto Carlos, Clarence Seedorf, Davor Suker na Predrag Mijatovic, batwaye Champions League muri 1997/98.

Mu mwaka wa 2000, nibwo Florentino Perez yatsinze mu matora ya perezida uyu Sanz wari umaze imyaka 5 ari umuyobozi wa Real Madrid.

Yongeye kumutsinda bwa kabiri mu matora ya perezida yo mu mwaka wa 2004.

Ku buyobozi bwa Sanz,Real Madrid yatwaye UEFA Champions League ebyiri,harimo iyo mu mwaka wa 1998 yari imaze imyaka 32 itayikoraho, igikombe cya Intercontinental Cup, shampiyona, Spanish Super Cup, Basketball league title na Saporta Cup.