Ikipe ya Manchester City yanganyije 0-0 na Arsenal mu mukino wa shampiyona y’Ubwongereza igeze mu mahina ziharira Liverpool umwanya wa mbere.

Sponsored Ad

Muri uyu mukino wabereye Etihad Stadium,aya makipe yacunganye habura iyinjiza indi igitego bagabana amanota.

Agahigo Manchester City yari ifite k’imikino 57 yinjiza igitego mu makipe yakiriye kuri Etihad Stadium kahagaritswe n’iyi Arsenal uyu munsi.Hari hashize imyaka ibiri Man City yinjiza ikipe yose yakiriye ku kibuga cyayo igitego.

Liverpool niyo yungukiye mu guhangana kw’aya makipe kuko yatsinze Brighton ibitego 2-1 ihita ifata umwanya wa mbere aho irusha Arsenal amanota abiri,ikarusha Man City amanota atatu mu gihe habura imikino icyenda gusa.

Arsenal yari imaze imikino umunani yikurikiranya itsinda ariko byarangiye inaniwe Man City nubwo yaruhijwe mu guhererekanya umupira.Mu mikino 8 yinjijemo ibitego 33.

Amahirwe akomeye yabonetse muri uyu mukino,ni igitego cyabazwe Nathan Ake wa City yahushije ubwo yateraga umupira mwiza n’umutwe ari imbere y’umuzamu Raya awumuha mu maboko.

Jesus nawe yahushije igitego cyiza ku ruhande rwa Arsenal ndetse na Trossard yananiwe gukoresha neza umupira yahawe asigaranye n’izamu.

Erling Haaland yagowe bikomeye n’ubwugarizi bwa Gabriel Magalhaes na William Saliba ba Arsenal.

Man City nta kipe n’imwe yatsinze mu makipe atanu ya mbere muri shampiyona y’uyu mwaka.Icyakora yatsinze Man United imikino yombi.

William Saliba niwe watowe nk’umukinnyi w’umukino.

Urutonde rw’amakipe ashaka igikombe n’amanota bafite

1. Liverpool 67 Pts
2. Arsenal 65 Pts
3. Man City 64 Pts