Ku kibuga cyayo Etihad Stadium, ikipe ya Manchester City y’umutoza Guardiola yanyagiye Arsenal, iri ku mwanya wa mbere ku rutonde rw’agateganyo rwa shampiyona, ibitego 4-1.
Man City yinjiye neza muri uyu mukino bituma ku munota wa karindwi gusa,ifungura amazamu ku gitego cyatsinzwe na Kevin De Bruyne,ku mupira yahawe na Haaland, asiga ab’inyuma ba Arsenal,atera ishoti umunyezamu Ramsdale atabashije gukuramo.
Mbere y’uko igice cya mbere kirangira, John Stones yatsindiye Manchester City (...)

Sponsored Ad

Ku kibuga cyayo Etihad Stadium, ikipe ya Manchester City y’umutoza Guardiola yanyagiye Arsenal, iri ku mwanya wa mbere ku rutonde rw’agateganyo rwa shampiyona, ibitego 4-1.

Man City yinjiye neza muri uyu mukino bituma ku munota wa karindwi gusa,ifungura amazamu ku gitego cyatsinzwe na Kevin De Bruyne,ku mupira yahawe na Haaland, asiga ab’inyuma ba Arsenal,atera ishoti umunyezamu Ramsdale atabashije gukuramo.

Mbere y’uko igice cya mbere kirangira, John Stones yatsindiye Manchester City igitego cya kabiri cyabanje kwangwa bivugwa ko yari yaraririye, ariko nyuma yo kwifashisha amashusho ya VAR, igitego kiremerwa.

Igice cya kabiri kigitangira,ku munota wa 53,Kevin De Bruyne yatsinze igitego cya gatatu cyaturutse ku burangare bw’abakinnyi bo hagati ba Arsenal batakaje umupira.

Ku munota wa 86, Rob Holdling yatsindiye Arsenal igitego cy’impozamarira.Erling Haaland yatsinze igitego cya kane cya Manchester City ku munota wa gatanu w’inyongera.

Ubu City irarushwa amanota abiri na Arsenal, mu gihe City ifite imikino ibiri itarakina y’ikirarane.

City isigaje imikino irindwi yose hamwe, uhereye ku mukino wo ku cyumweru izakina na Fulham, mbere yuko yakira iwayo imikino na West Ham na Leeds.

Umutoza Pep Guardiola avuga ko ikipe ye ya Manchester City yerekanye ko ishoboye iyo "nta yandi mahitamo ahari uretse gutsinda", nyuma yuko inyagiye Arsenal bigatuma guhatanira igikombe cya Premier League biba mu biganza byayo.

Guardiola yagize ati: "Ntabwo dushobora gutakaza intumbero yacu. Ubu [igikombe] kiri mu biganza byacu.

"Iyi mikino itatu iri imbere ni yo izagena niba dushobora gukora icyo dushaka gukora. Ukuri ni uko tukiri inyuma ya Arsenal.

"Ntibizatworohera, ariko ni [ugufata] umukino umwe ku wundi tukareba ikiba.

"Igihe [igikombe] kiri mu biganza byacu, tugomba kubikoresha".

Biracyashoboka ko City yegukana ibikombe bitatu muri uyu mwaka w’imikino, ari byo igikombe cya Premier League, icya Champions League n’icya FA Cup.

Guardiola avuga ko ubunararibonye bw’abakinnyi be, bazi icyo bisaba kugira ngo batsinde mu bihe by’amahina (bya nyuma) by’umwaka w’imikino, burimo kuba ingenzi cyane.

Uyu Munya-Espagne wahoze atoza Barcelona na Bayern Munich yagize ati: "Abakinnyi barabizi ko ari ngombwa kuvuga ko [igikombe] kiri hafi kandi ko ducyeneye gutsinda kugira ngo dukomeze kuba mu bagihatanira.

"Iyo myumvire yuko uba nta yandi mahitamo ufite atari ugutsinda ni imyumvire myiza cyane yo gukinana. Abakinnyi berekanye ko bajya muri buri mukino intego ari ukugerageza gutsinda".

De Bruyne yavuze ko hakiri urugendo "rurerure", nubwo abantu benshi batekereza ko City ubu isa nk’iyamaze kwizera gutsindira igikombe cya shampiyona ku nshuro ya gatatu yikurikiranya.

Yagize ati: "Turabizi ibyo abantu bavuga. Biragoye cyane. Hari ibintu byinshi bishobora kuba.

"Haracyari imikino irindwi isigaye – kandi turacyabari inyuma [ ku rutonde rw’agateganyo rwa shampiyona]. Abantu bavuga ko tuzatsindira igikombe. Ntituzatezuka kugeza igihe imibare izaba ibigaragaza ko tuzagitsindira. Gahunda yacu y’imikino iri imbere irimo akazi kenshi cyane".

Arteta atekereza ko Arsenal igomba gutsinda imikino yose isigaje

Umutoza wa Arsenal Mikel Arteta avuga ko ikipe ye igomba gutsinda imikino itanu yose isigaje kugira ngo igire amahirwe yo gutsindira igikombe cyayo cya mbere kuva mu mwaka wa 2004.

Iyi kipe y’umutoza Arteta, yasoje iri ku mwanya wa gatanu mu mwaka w’imikino ushize, yarushaga City amanota umunani mu ntangiriro y’uku kwezi kwa Mata.

Ariko kunganya kwayo mu mikino itatu ikurikiranye – ubwo yakinaga na Liverpool, West Ham na Southampton – byatumye itakaza umuvuduko yari ifite, mbere y’umukino wayihuje na City, wari wavuzwe ko ari wo ugena ikipe izegukana iki gikombe.

Arteta yagize ati: "Twari tubizi ko ducyeneye kuba tumeze neza cyane nk’ikipe. Twari turi kure cyane y’ibyo.

"Sinzi ikizacyenerwa [ku gutsindira igikombe]. Tugomba gutera abakinnyi akanyabugabo kuko bamerewe nabi. Biragoye kubyakira".

Abajijwe niba Arsenal icyeneye gutsinda imikino itanu yose isigaje, uyu mutoza wayo yagize ati: "Ni ko mbitekereza".

Ariko uyu mutoza w’Umunya-Espagne yavuze ko atewe ishema n’uko ikipe ye yitwaye muri uyu mwaka w’imikino, avuga ko irimo gukina ku kigero cyo hejuru kirenze icyari cyitezwe.

Arteta, wabaye umutoza wungirije Guardiola muri City kuva mu 2016 kugeza mu 2019, yagize ati: "Ni ijoro rigoye cyane, ukuntu twatsinzwe, ariko tugomba guhaguruka tukareba ibiri imbere by’ingenzi cyane.

"Kuba turimo kuryana isataburenge [kuba turimo guhatana] n’iyi kipe ya City biragoye kubyiyumvisha.

"Hasigaye imikino itanu kandi ikintu cyose gishobora kubaho. Mu myaka ishize, nabonye ko ibintu byinshi bishobora kubaho muri iyi shampiyona. Tugomba kwemera ko twatsinzwe n’ikipe idasanzwe".

BBC