Ikipe ya Manchester City yagaragaje ko ishaka kwisubiza igikombe cya shampiyona yatwaye ubushize,nyuma yo gusanga Arsenal ku kibuga cyayo ikayitsinda ibitego 3-1.
Mu mukino wari ugoye ku mpande zombi zashakaga umwanya wa mbere,Man City yagaragaje ko ifite abakinnyi bashoboye ikosora amakosa akomeye yakozwe na ba myugariro ba Arsenal.
Ku nshuro ya mbere muri uyu mwaka w’imikino,Arsenal imaze imikino 3 idatsinda kuko nyuma yo gutsindwa na Everton,yanganyije igitego 1-1 hanyuma itsindwa na (...)

Sponsored Ad

Ikipe ya Manchester City yagaragaje ko ishaka kwisubiza igikombe cya shampiyona yatwaye ubushize,nyuma yo gusanga Arsenal ku kibuga cyayo ikayitsinda ibitego 3-1.

Mu mukino wari ugoye ku mpande zombi zashakaga umwanya wa mbere,Man City yagaragaje ko ifite abakinnyi bashoboye ikosora amakosa akomeye yakozwe na ba myugariro ba Arsenal.

Ku nshuro ya mbere muri uyu mwaka w’imikino,Arsenal imaze imikino 3 idatsinda kuko nyuma yo gutsindwa na Everton,yanganyije igitego 1-1 hanyuma itsindwa na Man City ibitego 3-1.

Arsenal yaherukaga gutsindwa imikino 10 yaherukaga gutsindwa na Man City,yatsinzwe uwa 11 ndetse inatakaza umwanya wa mbere kubera ikinyuranyo cy’ibitego.

Manchester City yakoze ikinyuranyo mu gice cya kabiri cy’uyu mukino ubwo yatsindaga ibitego 2 ndetse inahusha uburyo bwinshi bwabazwe.

Takehiro Tomiyasu niwe watangiye ahemukira Arsenal,kuko yananiwe kurenza umupira ubwo yari asumbirijwe n’umukinnyi wa City,awusubiza inyuma awihera Kevin de Bruyne nawe aroba umunyezamu wa Arsenal,Aaron Ramsdale ku munota wa 24.

Arsenal yaje kubona igitego cyo kwishyura ku munota wa 43 gitsinzwe na Bukayo Saka kuri penaliti nyuma y’ikosa umunyezamu Ederson yakoreye Eddie Nketiah.Igice cya mbere cyarangiye ari igitego 1-1.

City yagarutse mu gice cya kabiri iri hejuru cyane ndetse iza guhabwa penaliti kigitangira ubwo Erling Haaland yategerwaga mu rubuga rw’amahina na Gabriel nawe utari mu mukino.

Icyakora VAR yakoze akazi kayo igaragaza ko uyu rutahizamu yari yaraririye,iyi penaliti ikurwaho.

Gabriel yatakaje umupira bituma Bernardo Silva na Haaland bahereza umupira mwiza Jack Grealish atsinda igitego cya kabiri cya City ku munota wa 72.

Akaga kagwiriye Arsenal yashakaga kwishyura ubwo ku munota wa 82 yatsindwaga igitego cya 3 na Haaland ku mupira mwiza yahawe na De Bruyne mu rubuga rw’amahina.

Nubwo City yatangiye shampiyona igaragaza ko idakanganye,yagarutse mu bihe byiza ndetse biragaragara ko ishaka kwisubiza shampiyona ahanini bitewe n’ubunini bw’ikipe ifite.

Uyu mukino wagaragaje cyane ko Arsenal ikeneye impinduka mu bakinnyi bayo babanza mu kibuga kuko bari kugaragaza umunaniro ndetse imbaraga z’ubusatirizi bwayo zaragabanutse.

Nubwo Arsenal inganya amanota 51 na Man City ndetse ikaba inafite umukino w’ikirarane,nta bushobozi iri kwerekana bwatuma ihagarika iyi kipe ifitwe n’abarabu gutwara igikombe cya Premier League cya 5 mu myaka 6 ishize.