Amakipe akunzwe cyane mu Bwongereza ariyo Manchester United na Chelsea yatangiye nabi imikino ya Premier League ziri ku rwego rwo hasi byatumye abafana bazo bahangayika bikomeye.

Sponsored Ad

Nubwo zari zagerageje kwitwara neza ku munsi wa mbere,izi kipe zagaragaje urwego rwo hasi mu mukino wa kabiri byatumye benshi batekereza ko zizakora nk’ibyo zakoze mu mwaka w’imikino ushize.

Man United yari yatsinze bigoranye Wolves mu mukino wa mbere igitego 1-0 ariko kubera imyitwarire mibi y’abasifuye uwo mukino bimye Wolves byabaviriyemo guhagarikwa.

Muri uwo mukino,Man United yahushijwe ibitego byinshi cyane ndetse umunyezamu wayo Onana akora penaliti itaratanzwe ariyo yaviriyemo abasifuzi guhagarikwa.

Muri uwo mukino,kizigenza Casemiro yitwaye nabi cyane ndetse ni nako byagenze no ku mukino batsinzwe na Tottenham ibitego 2-0 kuwa Gatandatu.

Ikipe ya Tottenham yari yakiriye United,yaratunguranye iyirusha umukino ndetse yereka abakunzi ba United ko ikipe yabo yoroshye cyane.

Ibitego bya Tottenham byose byinjiye mu gice cya kabiri bitsinzwe na Pape Mat Sarr ndetse na Lisandro Martinez witsinze.

Icyakora iyi Tottenham yahushije ibindi bitego birimo umupira wagaruwe n’umutambiko watewe na Pedro Perro n’indi myinshi.

Man United yagaragaje ko hari byinshi byo gukora kugira ngo yongere ikomere ndetse ibe yasubira mu zihatanira Premier League harimo gushaka rutahizamu mwiza,gushaka umukinnyi urusha urwego Antony no gushaka ufatanya na Casemiro.

Ku rundi ruhande,Chelsea yanganyije igitego 1-1 na Liverpool ubona iri hejuru,yagaragaje ko ikiri hasi ubwo yatsindwaga ibitego 3-1 na West ham yari yayakiriye kuri iki cyumweru tariki ya 20 Kanama.

Nubwo imaze gushora arenga miliyoni 800 z’amapawundi mu kugura abakinnyi mu gihe kitarenze umwaka,Chelsea ntigaragaza urwego rwo gukomera no gukanga abakeba.

Iyi Chelsea yatsinzwe igitego ku munota wa 7 na Nayef Aguerd gusa iza kucyishyura gitsinzwe na Chukwuemeka ku munota wa 28 ndetse ibona amahirwe yo kurangiza igice cya mbere itsinze ariko Enzo Fernandez ahusha penaliti yahawe biturutse ku ikosa Sterling yakorewe.

Chelsea iri hasi yatsinzwe igitego cya kabiri ku munota wa 53 gitsinzwe Michail Antonio ku ishoti rikomeye yarekuye.

Chelsea mu gushimangira urwego rwayo,yananiwe kwishyura iki gitego Westham yahawe ikarita itukura ya Nayef Aguerd ku munota wa 67.

West ham y’abakinnyi 10 yaje kubona igitego cya 3 mu minota yongewe kuri 90 kuri Penaliti yatsinzwe na Paqueta nyuma y’ikosa Caicedo yakoreye kuri Emerson mu rubuga rw’amahina.

Caicedo waguzwe miliyoni 115 z’amapawundi,yakinnye iminota 20 ariko yayikozemo iyi penaliti yakuye mu mukino Chelsea.

Ikipe ya Chelsea ifite akazi gakomeye ko kuzamura urwego rw’abakinnyi igura ubutitsa kandi ku kayabo ko hejuru cyane.

Mu mikino 31 iheruka gukina yatsinzemo 5 gusa.

Mu yindi mikino,Man City yatsinze Newcastle United igitego 1-0 cya Julian Alvarez,Liverpool yahawe ikarita itukura ya Mac Allister itsinda Bournemouth ibitego 3-1 bya Luis Diaz,Mo Salah na Diogo Jota.Arsenal irakina kuri uyu wa Mbere.

Indi mikino

Liverpool 3-1 AFC Bournemouth
Fulham 0-3 Brentford
Wolves 1-4 Brighton FC
Aston Villa 4-0 Everton