Abashinzwe gutegura shampiyona ya Ligue 1[LFP] bamaze kwemeza ko Paris Saint-Germain igomba guhabwa igikombe cya shampiyona n’ubwo yahagaritswe imikino itaratangira kubera COVID-19.

Sponsored Ad

Kuwa kabiri w’iki cyumweru nibwo minisitiri w’intebe w’Ubufaransa,Edouard Philippe, yatangaje ko kubera icyorezo cya COVID-19 imikino itazagaruka mbere y’ukwezi kwa Kanama 2020 ariyo mpamvu shampiyona 2019-2020 mu cyiciro cya mbere n’icya kabiri yasubitswe.

Abategura iyi shampiyona bavuga ko nubwo imikino ya Ligue 1 itarangiye,ikipe ya PSG yari iyoboye urutonde ikwiriye guhabwa igikombe cya shampiyona.

Akaga gakomeye kabaye ku makipe ya Amiens naToulouse yahise amanurwa mu kiciro cya kabiri nubwo hari hasigaye imikino 10 yo gushaka amanita.

Paris Saint-Germain, Marseille na Rennes zizitabira Champions League y’ubutaha mu gihe Lille, Reims na Nice zizakina Europa League. FC Lorient na RC Lens,nizo zazamuwe mu kiciro cya mbere 2020-2021.

Ikipe ya PSG itwaye igikombe irusha amanota 12 ikipe ya Marseille yari iyikurikiye ndetse yari izigamye umukino umwe.

Iyi kipe y’ubukombe mu mujyi wa Paris,itwaye igikombe cya shampiyona 3 kikurikiranya ndetse kibaye icya 9 mu mateka yayo.

Ikinyamakuru Le Parisien cyavuze ko Minisitiri Philippe yavuze ko muri Kanama aribwo ibikorwa by’umupira bizasubukurwa ndetse ngo bitanakunda ko abakinnyi bakina muri stade nta mufana urimo.

Amakipe yo mu Bufaransa yari yifuje ko yasubukura imyitozo kuwa 11 Gicurasi 2020,ariko Guverinoma y’Ubufaransa yavuze ko imikino itari ikintu cyihutirwa.

LFP yari yavuze ko hazaba inama muri Gicurasi 2020,kugira ngo batoranye amakipe azamuka n’andi amanuka ariko byatangajwe ko PSG yegukanye iki gikombe.

Mu minsi yashize,Perezida wa UEFA, Aleksander Ceferin n’umunyamabanga mukuru,Theodore Theodoridis,bavuze ko nibura tariki 02 Kanama 2020,amashampiyona y’imbere mu bihugu yaba yarangiye.

Nyuma y’aho Ubufaransa bwiyemeje guhagarika Ligue1 ndetse na Ligue2,bwiyongereye ku Ubuholandi n’Ububiligi nabo batangaje ko bagize imfabusa shampiona zabo.

Haribazwa niba Ubwongereza nibindi bihugu nka Espagne, Ubudage n’Ubutaliyani nabo bazafata uyu mwanzuro.

Inkubiri yo guhagarika shampiyona yageze no muri aka karere ka Afurika y’Iburasirazuba,kuko Ishyirahamwe ry’umupira w’amaguru muri Kenya bnaryo ryahisemo guhagarika shampiyona kubera icyorezo cya Covid_19 kigikomeje, bahitamo guha igikombe cya shampiyona ikipe ya Gor Mahia nyamara iyi shampiyona yari igeze ku munsi wa 23, iyi kipe yarushaga Kakamega Homeboys iyikurikiye amanota 7 gusa.

PSG na Gor Mahia zahawe ibikombe nyuma y’ihagarikwa rya za shampiyona