Bigoranye,Rayon Sports y’abakinnyi 9 yanganyije na Gasogi United igitego 1-1 biyiha amahirwe yo kuzamuka iyoboye itsinda B n’amanota 9 mu gihe Rutsiro FC nayo yatsinze Kiyovu Sport ibitego 2-1 nayo izamuka ku mwanya wa kabiri.

Sponsored Ad

Rayon Sports yabonye amahirwe menshi mu gice cya mbere ariko Sugira Ernest akayitenguha,yagowe n’uyu mukino wa Gasogi United ya KNC.

Ku munota wa munani w’umukino Sugira Ernest yabonye amahirwe akomeye ku mupira yari ahawe na Manace Mutatu,asigarana n’izamu ryonyine ateye umutwe ujya hanze.

Ku munota wa 13,Luvumbu yari afunguye amazamu ku mupira yateye ahagaze wenyine mu rubuga rw’amahina,myugariro wa Gasogi awugaruza akaguru.

Ku munota wa 14 Gasogi United yateye ishoti rya mbere rigana mu izamu ariko umunyezamu Kwizera Olivier arawufata.

Ku munota wa 15 Sugira yasigaranye n’izamu ateye ishoti,umunyezamu Mazimpaka awushyira muri koloneri.

Ku munota wa16 Rugwiro Herve yateye umutwe ku mupira wari uturutse kuri Koloneri ya Manace, Mazimpaka awukuramo.

Ku munota wa17 Luvumbu Heritier yashose umupira ukomeye mu izamu, ariko umukinnyi wa Gasogi United ashyiraho umutwe umupira arawurenza.

Ku munota wa 32, Rugwiro Herve yagonganye na Kwizera Olivier, yitabwaho n’abaganga ariko biza kurangira asimbujwe Mudacumura Jackson.Igice cya mbere cyarangiye ari 0-0.

Ku munota wa 48 Gasogi United yahushije igitego cyabazwe ubwo Kwizera yasohokaga mu izamu umukinnyi wa Gasogi United aramuroba uyu munyezamu agarurira umupira ku murongo.

Ku munota wa 79 Rayon Sports yabonye ku ikosa Mazimpaka Andre yakoreye Luvumbu Heritier bari basigaranye bonyine.

Iyi penaliti yatewe na Sugira Ernest abanza kuyihusha ariko umusifuzi wo ku ruhande avuga ko Mazimpaka yakuyemo uyu mupira yavuye mu murongo,biba ngombwa ko isubirwamo uyu rutahizamu ayitera neza.

Nyuma yo kwinjiza iki gitego uyu musore yahise ahabwa ikarita y’umutuku nyuma yo guhabwa ikarita ya kabiri y’umuhondo kubera kwishimira mu buryo budahwitse igitego acecekesha abafana ba Gasogi United.

Bidatinze ku munota wa 85 Gasogi United yabonye Penaliti nyuma y’aho Umunyezamu Kwizera Olivier ahawe umupira aho kuwohereza imbere cyangwa ngo awurenze ashaka kuwugarura mu rubuga rw’amahina,rutahizamu Kikoyo wa Gasogi arawumutanga uyu ahita amukurura.

Iyi penaliti yatewe neza na Hassan Kikoyo atsindira igitegoGasogi United cyo kwishyura.

Gasogi United yananiwe gukoresha amahirwe yabonye ubwo Manace Mutatu yahabwaga ikarita ya kabiri y’umuhondo yabyaye umutuku ku munota wa 90 ariko mu minota 4 yongewe ntibone ikindi gitego.Umukino warangiye ari igitego 1-1.

Mu wundi mukino wabaye kuri uyu wa Mbere muri iri tsinda B Kiyovu Sports yatsinzwe ibitego 2-1 na Rutsiro FC bituma iyi kipe yo mu burengerazuba izamuka ku mwanya wa kabiri.

Mu itsinda A,ikipe ya APR FC yatsinze Gorilla FC, ibitego bitatu ku busa,bituma irangiza imikino 6 iyitsinze ku manota 18/18.

Ibitego byabonetse muri uyu mukino, byatsinzwe na Ruboneka Jean Bosco ku munota wa 4′ Manishimwe Djabel ku munota wa 87′ mu gihe ikindi cyatsinzwe na Mugunga Yves ku munota wa 90′

Uko itsinda B ryasojwe:

1.Rayon Sports 9pts
2.Kiyovu Sports 7pts
3.Gasogi United 8pts
3.Rutsiro FC 8pts

Amakipe arindwi amaze kubona tike:

1. APR FC
2. Rayon Sports
3. Rutsiro FC
4. As Kigali
5. Police FC
6. Marines FC
7. Espoir FC

8. Hagati ya Gorilla FC na Bugesera FC hazazamukamo ikipe imwe
Gorilla amanota 9 , Bugesera FC amanota 6+ Umukino izakina na As Muhanga kuwa Kane.