Rayon Sports ni imwe mu makipe make twavuga ajya akora mu jisho ikipe ya APR FC ndetse rimwe na rimwe ikayitwara igikombe. Mu myaka yatambutse ubwo yabaga nta gatege ifite yagiye ibona iziyisigariraho nka As Kigali ndetse na Kiyovu Sports gusa uyu mwaka bisa naho habuze umusigire ari yo mpamvu Rayon Sports yeguye akabando ikagaruka ku rugamba nubwo byagaragaraga ko ititeguye bihagije.

Sponsored Ad

Imyaka yabanje byari bimeze gute?

Duhereye mu 2016 ubwo amakipe yabaga 30, ku munsi wa 23 wa Shampiyona, Rayon Sports yari ifite amanota 52, inganya na APR FC, ariko APR FC yegukana igikombe n’amanota 67 kuri 61 ya Rayon Sports.

Ikipe ya Musanze FC yayoboye shampiyona kugera ku munsi wa 12, ndetse abantu batangira kwibaza niba igikombe kizambuka Mukungwa, ariko ubu siko bimeze

Mu 2017, ku munsi wa 23 wa Shampiyona Rayon Sports yari ifite amanota 58 APR FC ifite 47, Rayon Sports yegukanye igikombe cya shampiyona ifite amanota 73 kuri 61 ya Police FC. Uyu mwaka w’imikino niwo mwaka waherukaga aho ikipe igera ku munsi wa 23 irusha iya kabiri amanota agera ku 10, kandi bigaragara ko ayo manota atavuyemo.

Mu 2018, ku munsi wa 23, AS Kigali yari ku mwanya wa mbere n’amanota 48 mu gihe APR FC yari ifite amanota 45, APR FC ikaba yaregukanye igikombe ifite amanota 66 kuri 61 ya AS Kigali.

2019, ku munsi wa 23 wa Shampiyona APR FC yari ku mwanya wa mbere n’amanota 54, Rayon Sports ku mwanya wa kabiri n’amanota 51, Rayon Sports itwara igikombe ifite amanota 72, APR FC ifite 65 ku mwanya wa kabiri.

Mu 2020, shampiyona yakinwe imikino 23 kubera COVID-19, APR FC iyegukana ifite amanota 57 kuri 50 ya Rayon Sports. 2021, shampiyona yakinwe mu matsinda APR FC iyegukana inganya na AS Kigali amanota 19 ariko iyirusha ibitego.

Mu 2018, AS Kigali yasigariyeho Rayon Sports ariko yari ihasize umugongo

Mu 2022 ku munsi wa 23 wa Shampiyona, APR FC yari ku mwanya wa mbere n’amanota 51 irusha inota 1 Kiyovu Sports, APR FC itwara igikombe ifite amanota 66 irusha inota rimwe Kiyovu Sports. Mu 2023, ku munsi wa 23 wa Shampiyona APR FC yari ifite amanota 49 ari iya mbere Kiyovu Sports ari iya kabiri n’amanota 47, APR FC itwara igikombe inganya amanota na Kiyovu Sports ariko iyirusha ibitego.

Uyu munsi Rayon Sports igiye guhura na APR FC iyirusha amanota 10 yose. Ni ikintu gikomeye cyane n’ubwo bishoboka, kuba Rayon Sports yagaruka mu rugamba rwo guhatanira igikombe kuko kugirango ibigereho isabwa gutsinda imikino yose isigaye kandi APRF FC igatsindwa nibura imikino 3.

Ese ibi Rayon Sports iraza kubishobora? Reka tubitege amaso.