Ikipe ya Rayon Sports irakataje mu kwiyubaka aho yakiriye umukinnyi w’Umurundi witwa Emmanuel Mvuyekure “Manou”uje kuyikinira mu mwaka umwe w’imikino.

Sponsored Ad

Uyu mukinnyi wageze mu Rwanda kuri uyu wa Gatanu tariki ya 04 Kanama 2023 asanzwe akina hagati mu kibuga asatira izamu.Emmanuel Mvuyekure yahoze ari Kapiteni wa KMC FC.

Nyuma yo kubura Bigirimana Abedi,Rayon Sports ngo yashatse undi murundi w’umuhanga ibona uyu usanzwe akundwa n’umutoza Etienne Ndayiragije.

Bamwe mu barundi bazi uyu mukinnyi Mvuyekure babwiye Fine FM ko uyu mukinnyi akuze ndetse atari ku rwego benshi bakeka ko ariho nubwo ahamagarwa mu ikipe y’igihugu.

Umwe mu bakurikirana imikino mu Burundi yavuze ko uretse kuba uyu mukinnyi atari ku rwego rwa Abedi ngo n’abakinnyi baguzwe na Kiyovu na Bugesera bamurusha.

Uyu mugabo arerekanwa kuri uyu wa Gatandatu, ku Munsi w’Igikundiro.

Icyakora uyu murundi wakiniye KMC, Azam FC, Mbao FC zo muri Tanzania; LLB y’i Burundi na Extension Gunners FC yo muri Botswana yageze i Kigali aho aje gukinira Rayom Sports.

Manou yabanje mu kibuga ubwo Burundi bwatsindaga Namibia 3-2 mu gushaka itike y’igikombe cya Afurika kizaba mu mwaka utaha.

Ikipe ya Rayon Sports izahagararira u Rwanda muri CAF Confederations Cup aho izategereza izarokoka hagati ya Al Hilal Benghazi yo muri Libya na Kakamega Homeboyz.

Ikipe ya Al Hilal Benghazi yatangiye umwiherero mu Misiri, Kakamega Homeboyz iri Kampala.

Mu mukino wa gicuti, KCCA yabatsinze 2-0 bya Arafat Usama 29’ na Julius Poloto kuwa 67’.