Ikipe ya Rayon Sports yari imaze imyaka 4 mu bukorobi bwa APR FC,yayitsinze 1-0 mu mukino w’Umunsi wa 19 wa Shampiyona wabereye I Huye.
Imikino yari ishize ari 7 Rayon Sports itabasha gutsinda APR FC ariko uyu munsi yabigezeho ibifashijwemo na Ngendahimana Eric.
Uyu mukino watinze gutangira iminota 2 kubera ko izamu ritari rimeze neza,watangiye APR FC iri hejuru,Niyibizi Ramadhan agerageza uburyo bubiri bukomeye ariko umupira unyura hanze y’izamu rya Rayon Sports ryari ririnzwe na (...)

Sponsored Ad

Ikipe ya Rayon Sports yari imaze imyaka 4 mu bukorobi bwa APR FC,yayitsinze 1-0 mu mukino w’Umunsi wa 19 wa Shampiyona wabereye I Huye.

Imikino yari ishize ari 7 Rayon Sports itabasha gutsinda APR FC ariko uyu munsi yabigezeho ibifashijwemo na Ngendahimana Eric.

Uyu mukino watinze gutangira iminota 2 kubera ko izamu ritari rimeze neza,watangiye APR FC iri hejuru,Niyibizi Ramadhan agerageza uburyo bubiri bukomeye ariko umupira unyura hanze y’izamu rya Rayon Sports ryari ririnzwe na Hakizimana Adolphe.

Bizimana Yannick yahushije uburyo bwabazwe ku munota wa 20 ku mupira wari uhinduwe na Manishimwe Djabel ariko ashyizeho umutwe unyura hejuru y’izamu.

Rayon Sports yabonye amahirwe ya mbere ku munota wa 23 ku mupira Luvumbu yacomekeye Esenu ariko ateye unyura hanze.

Léandre Onana yagerageje ishoti ku munota wa 26 ariko umunyezamu Ishimwe Pierre arawufata.

Bizimana Yannick yateye ishoti rikomeye ku munota wa 27 ariko Hakizimana Adolphe arokora Rayon Sports, awushyira muri koloneri.

Ruboneka Jean Bosco yahawe ikarita ya mbere y’umuhondo ku ruhande rwa APR FC ku munota wa 30, ni ku ikosa yari akoreye Onana.

Iri kosa ryaje kuvamo igitego cya Rayon Sports Sports aho Luvumbu yayiteye maze Eric Ngendahimana atera mu izamu Ishimwe Pierre awukuramo ariko wari warenze umurongo.

Amakipe yombi yagiye kuruhuka ari kimwe cya Rayon Sports ku busa bwa APR FC.

Igice cya kabiri cyatangiye APR FC ikora impinduka nyinshi ariko ntabwo cyari cyiza ku mpande zombi kuko amakipe yacunganaga cyane.

APR FC yahushije igitego cyabazee ku munota wa 90 ku mupira Niyomugabo Claude yahinduye, Nshuti Innocent ashyiraho umutwe Adolphe awukuramo, Mugunga asongamo nabwo bawukuramo. Umukino warangiye ari 1-0.

Mu mikino 9 iheruka, APR FC yatsinzemo 7 banganya 2. Rayon Sports yaherukaga gutsinda APR FC tariki ya 20 Mata 2019, hari muri shampiyona ya 2018-19 ari na bwo iheruka igikombe cya shampiyona.

Ubwo amakipe yombi aheruka guhura, APR FC yatsinze igitego 1-0 cyinjijwe na Yannick.

Rayon Sports igize amanota 36 ku mwanya wa kane, irushwa rimwe na APR FC ya Kiyovu Sports, Gasogi United na AS Kigali bose bafite 35.