Umuryango wa Rayon Sports wunamiye inzirakarengane zishyunguye ku rwibutso rwa Nyanza ya Kicukiro, zazize Jenoside yakorewe Abatutsi.
Rayon Sports yabanje gukora urugendo rwo kwibuka ku nshuro ya 29 inzirakarengane zishwe muri Jenoside yakorewe Abatutsi mu 1994,rwasojwe no gusura uru rwibutso rwa Nyanza ya Kicukiro.
Iki gikorwa cyabaye uyu munsi tariki ya 08 Mata 2023.
Perezida w’Umuryango wa Rayon Sports, Uwayezu Jean Fidèle, yavuze ko bakoze uru rugendo mu rwego rwo kwibuka no guha (...)

Sponsored Ad

Umuryango wa Rayon Sports wunamiye inzirakarengane zishyunguye ku rwibutso rwa Nyanza ya Kicukiro, zazize Jenoside yakorewe Abatutsi.

Rayon Sports yabanje gukora urugendo rwo kwibuka ku nshuro ya 29 inzirakarengane zishwe muri Jenoside yakorewe Abatutsi mu 1994,rwasojwe no gusura uru rwibutso rwa Nyanza ya Kicukiro.

Iki gikorwa cyabaye uyu munsi tariki ya 08 Mata 2023.

Perezida w’Umuryango wa Rayon Sports, Uwayezu Jean Fidèle, yavuze ko bakoze uru rugendo mu rwego rwo kwibuka no guha agaciro Abatutsi barenga miliyoni bishwe muri Jenoside.

Ati “Urugendo nk’uru rugamije kwibuka kandi kwibuka ni inshingano za buri Munyarwanda wese. Iyo twibuka tuba dushaka guha agaciro ubuzima bw’Abatutsi barenga miliyoni bishwe mu 1994.”

Yakomeje agira ati “Ni ukugira ngo tuze, twe abakiri bato n’abanyamahanga, dusobanurirwe urupfu bapfuye, na Jenoside uko yakozwe muri uru Rwanda, bityo tuvuge ngo ntibizongere ukundi, turwane n’abashaka kuyipfobya n’abashaka kuyigarura. Icya kane ni ugukuramo amasomo y’amateka y’igihugu cyacu ndetse no gukuramo imbaraga zituma twubaka.”

Yongeyeho ko nk’Umuryango wa Rayon Sports ufite ikipe y’abagabo n’iy’abagore zikundwa na benshi, ari byiza gukora ibikorwa nk’ibi mu rwego rwo gukomeza kubiba amahoro no kuzirikana abari bagize uyu muryango bari mu Batutsi bishwe muri Jenoside.

Ati “Aba-sportifs turi ababibyi b’amahoro, ababibyi b’urukundo kuko iyo dukora siporo iraduhuza. Siporo si intambara, ni urukundo, ni ugukina nk’uko tubivuga.

Ubutumwa naha abarokotse, mu izina ry’Umuryango wa Rayon Sports ni ukubabwira ngo nimukomere, ni amateka yacu, byarabaye. Umuryango wa Rayon Sports turabakunda, turi kumwe, tuzaharanira ko ibi bitazongera kuba ukundi.”

Bamwe mu bakinnyi ba Rayon Sports n’abayobozi bayo barishwe muri Jenoside yakorewe Abatutsi, gusa nta rutonde rwose rw’abari abakinnyi bayo bose bazize Jenoside irabona, buri mwaka bagenda bongeraho abamenyekanye ndetse bakaba basaba abanyarwanda uwaba azi umukinnyi wayo wazize Jenoside utari ku rutonde ko yamenyesha iyi kipe.

Ni ikipe yashinzwe mu 1968, Jenoside yabaye imaze imaze imyaka 26, ikaba na yo yarashegeshwe na Jenoside yakorewe Abatutsi.

Urutonde rwa bamwe mu bari bagize ikipe ya Rayon Sports bazize Jenoside yakorewe Abatutsi mu w’i 1994