Real Madrid yacecetse mu masoko yo kugura abakinnyi aheruka,irashaka gukora agashya ikagurisha abakinnyi 6 bakomeye kugira ngo ibone ba rutahizamu 2 bagaragaza ko bazayobora isi mu minsi iri imbere aribo Erling Haaland na Kylian Mbappe.

Sponsored Ad

Ikinyamakuru Mundo Deportivo cyavuze ko abakinnyi bashobora kugurishwa no kurekurwa barimo Bale, Sergio Ramos, Raphael Varane, Hazard, Isco, na Marcelo.

Nubwo Ramos we azarangiza amasezerano mu mpeshyi,Real Madrid irashaka kugurisha bariya bakinnyi bandi kugira ngo ibone amafaranga ahagije.

Kylian Mbappe na Erling Haaland ni imari zishyushye ku isoko nyuma yo gukora ibitangaza mu mikino itambutse ya Champions League ndetse no mu mashampiyona bakinamo.

Mbappe wa Paris Saint Germain amaze gutsinda ibitego 30 anatanga imipira 9 yavuyemo ibitego mu mikino 36 amaze gukina muri uyu mwaka w’imikino mu gihe Haaland we amaze gutsinda 33 mu mikino 31 n’imipira yavuyemo ibitego 8 muri uyu mwaka w’imikino.

Real Madrid ngo irashaka kugura aba bakinnyi 2 icyarimwe kugira ngo bayifashe kongera gutegeka u Burayi muri ruhago gusa ntibyoroshye kuko amafaranga amakipe yabo abashakamo ari menshi cyane.

Ibinyamakuru biheruka gutangaza ko Borussia Dortmund ikeneye miliyoni 180 z’amayero kuri Erling Haaland mu gihe PSG nayo ishaka kugurisha Mbappe miliyoni zirenga 150 z’amapawundi.

Amasezerano ya Mbappe muri PSG azarangira muri 2022 ndetse uyu mukinnyi ntashaka kuyongera cyane ko bivugwa ko yifuza kwigira muri Real Madrid.

Amakuru avuga ko Varane adashaka kongera andi masezerano mu gihe Isco na Marcelo bashaka kugenda kubera ko badahabwa umwanya wo gukina.

Real Madrid irashaka kugurisha Eden Hazard kubera imvune ze zatumye ayihombya bikabije cyane ko yaguzwe arenga miliyoni 100 z’amapawundi.