Umukino wa nyuma wa Champions League hagati ya Chelsea na Manchester City wo ku itariki ya 29 y’uku kwezi kwa gatanu uzabera muri Portugal, abafana 6,000 kuri buri ruhande bemerewe kujya kuwureba.

Sponsored Ad

Uyu mukino wakuwe muri Turukiya ushyirwa mu mujyi wa Porto muri Portugal kubera amabwiriza yo kwirinda coronavirus.

Portugal iri ku rutonde rw’Ubwongereza rw’icyatsi kibisi (green list), ruvuze ko irimo ubwandu bwa Covid-19 buri hasi, rero abafana bashobora kuhajya ntibibe ngombwa ko bishyira mu kato igihe batahutse.

Turukiya yo iri ku rutonde rw’umutuku, rusobanuye ahari ubwandu bwinshi. Mbere, uwo mukino wa nyuma wari witezwe kubera ku kibuga cya Ataturk Olympic Stadium mu mujyi wa Istanbul.

Aleksander Ceferin, Perezida w’impuzamashyirahamwe y’umupira w’amaguru i Burayi (UEFA), yagize ati:

"Kwima abafana amahirwe yo kureba umukino imbona nkubone ntabwo byashobokaga kandi nshimishijwe no kuba uyu mwumvikano wagezweho".

UEFA, abategetsi bo muri leta y’Ubwongereza n’ishyirahamwe ry’umupira w’amaguru muri iki gihugu (FA), bakoranye inama biga ku kuba uwo mukino wakinirwa i Wembley.

Ariko ntibumvikanye ku gusonera akato abaterankunga, abanyamakuru n’abashyitsi b’imena.

Ceferin yongeyeho ati: "Abafana bababaye amezi arenga 12 badashobora kureba amakipe yabo imbona nkubone kandi kugera ku mukino wa nyuma wa Champions League ni agasongero k’umupira w’ikipe".

"Nyuma y’umwaka abafana bihanganyemo, ntabwo ari byo ko batagira amahirwe yo kureba amakipe yabo ku mukino wa mbere ukomeye wo mu mwaka w’imikino".

Amakipe ya Chelsea na Manchester City avuga ko ari mu biganiro na UEFA n’abandi bafatanya-bikorwa, ku bijyanye na gahunda y’amatike n’ingendo.

Uyu ni umwaka wa kabiri wikurikiranya umukino wa nyuma wa Champions League ukiniwe muri Portugal.

Ubuheruka, umujyi wa Lisbon ni wo wakiniwemo ibyiciro bya nyuma byacyererejwe by’irushanwa ryo mu mwaka ushize, ryegukanwe na Bayern Munich.

Umubare wa nyuma w’abo ikibuga Estadio do Dragao cy’i Porto kitagomba kurenza kwakira uracyigwaho.

Umukuru wa UEFA yemeye ko icyemezo cya leta y’Ubwongereza cyo gushyira Turukiya ku rutonde rutukura mu ngendo cyafashwe gishyize mu gaciro, ariko avuga ko cyasigiye UEFA "ingorane ikomeye".

Yashimiye FA n’abategetsi b’Ubwongereza "bakoze igishoboka cyose mu kugerageza gutuma umukino ubera mu Bwongereza". Ati: "Nifuzaga kubashimira akazi kabo mu kugerageza gutuma bishoboka".

Yongeyeho ko ishyirahamwe ry’umupira w’amaguru muri Turukiya n’abategetsi ba Turukiya "iteka bakomeje kuba abafatanya-bikorwa bo kwizerwa".

Ati: "Nizeye ko mu gihe cya vuba cyane kiri imbere nzaba ndi i Istanbul no muri Turukiya ku mukino wa nyuma wa Champions League no mu bindi bikorwa byinshi".

BBC