Ikipe ya FC Barcelona yanyagiye Real Madrid ibitego 3-1 iyitwara igikombe cya Super Cup cyabaye icya mbere umutoza Xavi yegukanye muri iyi kipe mu gihe mu Bwongereza ikipe ya Arsenal yabashije gutsindira Tottenham iwayo bwa mbere mu myaka 9 ishize.
Abasore bakiri bato isi yose itangarira kubera impano bafite aribo Gavi na Pedri bahaye akazi gakomeye Real Madrid,birangira bayitwaye iki gikombe cyakinirwaga muri Saudi Arabia.
Gavi w’imyaka 18,yatsinze igitego anatanga imipira 2 yavuyemo (...)

Sponsored Ad

Ikipe ya FC Barcelona yanyagiye Real Madrid ibitego 3-1 iyitwara igikombe cya Super Cup cyabaye icya mbere umutoza Xavi yegukanye muri iyi kipe mu gihe mu Bwongereza ikipe ya Arsenal yabashije gutsindira Tottenham iwayo bwa mbere mu myaka 9 ishize.

Abasore bakiri bato isi yose itangarira kubera impano bafite aribo Gavi na Pedri bahaye akazi gakomeye Real Madrid,birangira bayitwaye iki gikombe cyakinirwaga muri Saudi Arabia.

Gavi w’imyaka 18,yatsinze igitego anatanga imipira 2 yavuyemo ibindi 2 bituma FC Barcelona yihimura kuri uyu mukeba wabo wari umaze iminsi ayizengereza.

Real Madrid yari ifite iki gikombe giheruka,yaje muri uyu mukino idafite Tchouameni na Alaba byatumye ihungabana bikomeye mu bwugarizi ndetse no mu kibuga hagati kuko yaruhijwe bigaragara.

Hakiri kare cyane,FC Barcelona yahushije uburyo bukomeye ubwo Araujo yahabwaga umupira asigarana na Courtois ariko ntiyabasha kuwufata.

Nyuma y’aho FC Barcelona yazamukanye umupira uhabwa Lewandowski,atera ishoti rikomeye Courtois akuramo umupira ariko ugarurwa n’igiti cy’izamu.

Ntibyatinze ku munota wa 33 Gavi afungura amazamu ku gitego cyiza yatsinze yibye umugono ba myugariro ba Real Madrid ahawe umupira na Lewandowski.

Bidatinze ku munota wa 45,Gavi yahawe umupira ari wenyine ariruka asiga ba myugariro ba Real Madrid ahereza Lewandowski wari wenyine mu rubuga rw’amahina ashyiramo igitego cya kabiri.Igice cya mbere cyarangiye ari 2-0.

Urwego rwa Real Madrid rwakomeje kuba hasi no mu gice cya kabiri cyane ko yarushwaga mu kibuga hagati ndetse yagombaga gutsindwa igitego na Ousmane Dembele wasigaranye n’izamu ku mupira yahawe na Alejandro Balde gusa Courtois akora akazi.

Bidatinze ku munota wa 69,Real Madrid yatsinzwe igitego cya 3 na Pedri ku mupira mwiza yahawe na Gavi.

Uyu Gavi yazonze bikomeye Madrid ndetse yereka isi yose ko Modric na Kroos ntacyo bakora badafite umukinnyi ukina kuri 6 ubafasha.

Real Madrid yabonye igitego cy’impozamarira ku munota wa 3 mu nyongera bari bongeye kuri 90 gitsinzwe na Karim Benzema.

Birasa nkaho Barcelona iri imbere muri byose muri iyi minsi kuko no muri La Liga iyiri imbere iyirusha amanota 3.

Iki gikombe cya Super Cup cyabaye icya mbere Xavi yegukanye muri Barcelona nk’umutoza nyuma yo kuyitwaramo 25 mu myaka 17 yamaze ayikinira.

Ku rundi ruhande mu Bwongereza,Arsenal yazamuye ikinyuranyo yarushaga ikipe ya kabiri Man City iyikurikiye nyuma yo gutsinda Tottenham iyisanze iwayo ibitego 2-0.

Hari hashize imyaka isaga 7 Arsenal idatsindira Tottenham iwayo ariko kuri iki cyumweru yayitsinze ibitego 2-0 ndetse ihusha n’ibindi byinshi byashoboraga kuyifasha kuzamura ikinyuranyo.

Ikipe ya Arsenal yatwaye shampiyona inshuro 2 ziheruka itsinze Tottenhamumukino ubanza nuwo kwishyura ndetse muri uyu mwaka nabwo yongeye kubikora.

Nubwo shampiyona ikiri mbisi,Arsenal ikomeje gukora amakosa make cyane ugereranyije n’imyaka isaga 19 ishize.

Kwitsinda k’umunyezamu Hugo Lloris ndetse n’igitego cy’ishoti rikomeye cyane Martin Odegaard nibyo byahesheje intsinzi Arsenal.

Ku cyumweru,Arsenal izakira Manchester United mu mukino w’ishyiraniro cyane ko ariyo kipe yonyine yabashije kuyitsinda muri uyu mwaka w’imikino.

Uyu mukino uzaba ukomeye kuko United yagarurutse mu rugamba rwo guhatanira igikombe cya shampiyona nyuma yo gutsinda Man City ibitego 2-1.