Air Canada yasabye imbabazi nyuma yo kwirukana abagenzi babiri mu ndege kubera ko banze kwicara ku ntebe ziri kunukaho ibirutsi.

Sponsored Ad

Susan Benson wari muri serivisi mu ndege yavaga Las Vegas yerekeza Montreal, yavuze ko umupilote yaburiye abagenzi ko barashyirwa ku rutonde rw’abatemerewe kugenda nibakomeza kwitotomba.

Yongeyeho ko abakozi bagerageje kurwanya "impumuro mbi" bakoresheje parufe hamwe n’ikawa.

Air Canada yavuze ko abagenzi "bigaragara ko batahawe serivisi nziza bagombaga".

Madamu Benson yanditse ku rubuga rwa Facebook rw’iyi ndege mu mpera z’ukwezi gushize ati: "Ntabwo twabanje kumenya ikibazo icyo ari cyo."

"Ikigaragara ni uko mu rugendo rwabanje umuntu yari yarutse. Umukozi w’indege yasabye imbabazi cyane ariko asobanura ko indege yari yuzuye."

Yavuze ko abakozi bagerageje kwifashisha impumuro y’ikawa ndetse batera parufe ngo barebe ko umunuko ushira, ariko ko intebe n’umukandara "byari bitose kandi hakiri ibisigazwa by’ibirutsi".

Madamu Benson yavuze ko umupilote yavuye aho yicara nyuma y’iminota aba bagenzi bateza urusaku.

Abagenzi babwiwe ko "bashobora kuva mu ndege… bakishakira indi ibatwara ku giciro cyabo, cyangwa bakajyanwa n’umutekano bagashyirwa ku rutonde rwabatemerewe kugenda!"

Bahise bajyanwa hanze n’abashinzwe umutekano.

Madamu Benson yavuze ko uku gushwana kwatumye agira "isoni zo kuba Umunyakanada kandi atishimiye Air Canada".

Air Canada yavuze ko "irimo gusuzuma iki kibazo gikomeye" kandi ko "imikorere yabo itakurikijwe neza kuri iki kibazo".