Umushoferi w’imodoka y’ivani wo mu mujyi wa Ottawa, mu murwa mukuru wa Canada, yirukanywe ku kazi nyuma yo kugaragara muri videwo atera amazi abagenzi bagendaga n’ amaguru.

Sponsored Ad

Nkuko byatangajwe n’igitangazamakuru CBC cya leta ya Canada, kompanyi y’ubwubatsi ya Black & McDonald uwo mushoferi yakoreraga yatangaje mu butumwa bwo ku rubuga nkoranyambaga rwa Facebook ko uwo mushoferi "atakiri umukozi" wayo.

Videwo y’amasegonda 45 igaragaza uko byagenze yafashwe na kamera yegereye ku birahuri by’imodoka, yabaye kimomo ku mbuga nkoranyambaga. Imaze kurebwa inshuro zirenga ibihumbi 750.

Muri iyo videwo, uwo mushoferi utatangajwe izina agaragara asatiriza imodoka ku nzira y’abagenda ku maguru ku munsi imvura yagwaga, ubundi akabatera amazi nibura inshuro eshatu. Ku mpera y’iyo videwo, ikirango cya kompanyi yakoreraga kiragaragara mu rubavu rw’iyo modoka y’ivani yari atwaye.

Mu butumwa bwo ku rubuga nkoranyambaga rwa Facebook, iyi kompanyi Black & McDonald yasabye imbabazi kubera imyitwarire "itemewe" y’uwari umushoferi wayo.

Umuvugizi w’iyi kompanyi yavuze ko iri no gukorana bya hafi na polisi ya Canada. Nkuko bitangazwa n’ikinyamakuru the Ottawa Sun, uyu mushoferi ntabwo azakurikiranwa na polisi kuko polisi yasanze igihano yahawe na kompanyi yakoreraga cyo kumwirukana gihagije.

Uburyo iyi kompanyi yahise yirukana uwo mushoferi bwashimwe cyane ku mbuga nkoranyambaga.

Umwe muri bo yagize ati: "Ntabwo uhemberwa gutwara imodoka utosa abagenda ku maguru."

Umupolisi yogoshe ubwanwa umugabo utagira aho aba wari ugiye kubura akazi muri Kampani McDonald