Ni kenshi mu bitangazamakuru bitandukanye hagenda hagaragara inyubako zo hirya no hino ku isi nziza kurusha izindi, inyubako ndende kurusha izindi, imijyi n’ibindi. Uyu munsi bwiza.com yagerageje kwegeranya amafoto y’inyubako ndende ariko kandi zinateye ubwoba bitewe n’uburyo ziremetse ndetse n’aho zihagaze, ku buryo bigoye guhita wemera ko zibamo abantu.

Aya ni amafoto 10 y’inyubako zitandukanye ziteye ubwoba cyangwa se zisa n’izubatse mu manegeka ariko kandi zikomeye ahubwo ariko ziteye bitewe n’uburyo bene zo babishatse.

10. Tower Astra (Germany)

Iyi ni inyubako iza ku mwanya wa 10 kuri uru rutonde, ikaba ari inyubako iherereye mu mujyi wa Hamburg mu gihugu cy’u Budage. Ifite Metero zisaga 270 z’uburebure ikaba ari inzu yamenyekanye cyane guhera mu kinyejana cya 13.

9. Puerta de Europa(Spain)

Iyi na yo ni inyubako iteye ubwoba kubera uko yubatse, ikaba yaramenyekanye mu rwego rw’isi mu mujyi wa Madridmuri Esipanye. Ikaba ifite amagorofa 26.

8. Takasugi-an, (Japan)

Iyi na yo ni inyubako iza ku mwanya wa 8 mu nyubako zo ku isi zisa n’iziri ku manegeka, ikaba yubatse hajuru mu biti yubakishije imigano. iherereye mu mujyi wa Nagano mu gihugu cy’u Buyapani

7. Lichtenstein Castle (Germany)

iyi nyubako iza ku mwanya wa 7 mu nyubako zubatse ahantu hateye ubwoba, iyi ikaba iherereye mu mujyi wa Lichtenstein mu gihugu cy’u Budage, ikaba ifite metero zisaga 800 z’uburebure.

Iyi nyubako imaze ibinyejana bisaga 6. Yubatse hejuru y’ibitare ikaba ari n’ingoro yasigasiwe guhera muri iyo myaka yashize

6. Hanging Temple (China)

Iyi na yo ni inyubako imwe mu ziteye ubwoba ku isi, ikaba ari n’urusengero rugerereye mu ibanga ry’umusozi munini ugizwe n’ibitare. Iyi nyubako iri ku musozi witwa Heng uherereye mu mujyi wa Datong ikaba yarabayeho mu myaka itari micye ishize.

5. Leaning Tower of Pisa (Italy)

Iyi na yo ni igorofa imwe mu magorofa ateye ubwoba, ikaba irimo n’urusengero. Iherereye mu mujyi wa Pisa mu gihugu cy’u Butaliyani, ikaba ari inyubako yubakanye ubuhanga buhanitse bitewe n’ubutaka yahagaritsweho butemereraga rwiyemeramirimo kuyitereka neza uko bikwiye.

4. Meteora Monasteries (Greece)

Iyi nyubako yubatse ku musozi wa Meteora mu gihugu cy’u Bugiriki, ikaba ari n’imwe mu mitungo y’umuryango UNESCO.Yubatse hejuru y’umusozi w’ibibuye binini bifite ubutumburuke bukabije ikaba yarubatswe ahagana mu kinyejana cya 11.

3. Sutyagin House, Russia

Iyi nyubako na yo iherereye mu mujyi wa Archangel mu gihugu cy’u Burusiya.
Yubatswe n’ibiti, ikaba igizwe n’inyubako zigera kuri 13 zigerekeranyije ari na cyo gituma iza mu nyubako ziteye ubwoba kabone nubwo yaba ikomeye.

2. WoZoCo Apartments, Amsterdam

Iyi ni inyubako yitwa Oklahoma iherereye muri Amsterdam ikaba ari inyubako nini ihuza inyubako zisaga 100 zagenewe gutuzwamo abageze mu za bukuru.

Iza mu nyubako ziteye ubwoba ku isi kuko igiye ibite ibyumba biri inyuma ariko bifatanye n’inyubako bityo umuntu akaba yakwibaza niba bidashobora kuremererwa bikaba byahanuka.

1.Capital Gate, United Arab Emirates

Iyi na yo ni imwe mu nyubako ziteye ubwoba ku isi, bitewe n’uburyo iteretse ku butaka, ihengamye ndetse igiye isa n’iyiburungushuye.Iherereye mu mujyi wa Abu Dhabi ikagira Metero zisaga 160 ikaba inafatwa nk’inyubako ndende muri uriya mujyi.